नागपूर येथील समाजसेवक सुनील जवादे यांची ४ अल्पवयीन मुलांकडून हत्या !

नागपूर – समाजातील तरुणांनी स्वतःचे वर्तन चांगले ठेवावे, यासाठी मार्गदर्शन करणारे समाजसेवक आणि ‘समता सैनिक दला’चे निमंत्रक सुनील जवादे यांची ४ अल्पवयीन मुलांनी निर्घृण हत्या केली आहे. २५ नोव्हेंबर या दिवशी पहाटे ४-५ वाजल्याच्या सुमारास आरोपींनी त्यांच्या डोळ्यात लाल मिरचीची पूड टाकून त्यांच्यावर धारदार शस्त्रांनी वार केले. त्यामुळे जवादे यांचा जागीच मृत्यू झाला. ही घटना शहरातील इमामवाडा पोलीस ठाण्याच्या क्षेत्रात घडली. पोलिसांनी या प्रकरणी ४ आरोपींना अटक केली आहे. समाजसेवक सुनील जवादे यांचा संबधित मुलांसमवेत वाद झाला होता त्यातून ही हत्या झाली.