पंजाब येथील काँग्रेसच्या आमदाराकडून ‘तुम्ही गावासाठी काय केले ?’ असा प्रश्न विचारणार्‍या तरुणाला बेदम मारहाण !

‘आम्ही काहीही काम करणार नाही, त्याविषयी कुणी आम्हाला विचारायचेही नाही आणि विचारलेच, तर आम्ही त्याला बदडू’, या वृत्तीचे काँग्रेसचे आमदार ! अशा गुंड प्रवृत्तीच्या आणि निष्क्रीय आमदारांची आमदारकी रहित करून त्यांना घरचा रस्ता दाखवल्यासच ते वठणीवर येतील ! – संपादक

पठाणकोट (पंजाब) – पठाणकोट जिल्ह्यातील भाओ विधानसभा मतदारसंघातील काँग्रेसचे आमदार जोगिंदर पाल यांना ‘तुम्ही गावासाठी काय केले ?’, असा प्रश्न विचारणार्‍या तरुणाला मारहाण केली. पाल हे येथे एका छोट्या सभेत लोकांना संबोधित करत होते. त्या वेळी तेथे एक तरुण आला आणि पाल यांच्या भाषणाच्या मध्येच त्यांना वरील प्रश्न विचारला. यावर चिडलेल्या पाल यांनी तरुणास बेदम मारहाण केली. हे पाहून पाल यांच्या सुरक्षारक्षकांनीही सदर तरुणाला बेदम मारहाण केली. याविषयीचा एक व्हिडिओ सामाजिक माध्यमातून प्रसारित झाला आहे. हा व्हिडिओ नवरात्रीच्या कालावधीतील असल्याचे सांगितले जात आहे.

या घटनेविषयी राज्याचे गृहमंत्री सुखजिंदरसिंह रंधवा यांनी अप्रसन्नता व्यक्त केली आहे. ‘आमदारांनी असे वागू नये. आपण लोकप्रतिनिधी असून जनतेची सेवा करण्यासाठी येथे आहोत’, असे त्यांनी सांगितले. (केवळ असे शाब्दिक उपदेश देण्यापेक्षा गृहमंत्र्यांनी पाल यांच्यावर कारवाई करायला हवी, अशी जनतेची मागणी आहे ! – संपादक)