मांगेली परिसरात पहिल्याच पावसात उच्च दाबाच्या वीजवाहिनीचे खांब वाकले

दोडामार्ग – तालुक्यातील खोकरल धार, मांगेली कुसगेवाडी ते देऊळवाडीपर्यंत उभारण्यात आलेल्या ११ के.व्ही. उच्च दाबाच्या वीजवाहिनीचे अनेक लोखंडी खांब नुकत्याच पडलेल्या पावसात वाकले. त्यामुळे स्थानिक ग्रामस्थांमध्ये भीतीचे वातावरण निर्माण झाले आहे, तसेच कोट्यवधी रुपये खर्चून उभारण्यात आलेल्या खांबांच्या कामांविषयी गंभीर प्रश्नचिन्ह निर्माण झाले आहे.

ही वीजवाहिनी रस्त्याच्या बाजूपट्टीला (साईडपट्टीला) टेकून उभारण्यात आली आहे. खांब उभारण्यासाठी आवश्यक त्या निकषांनुसार खोदकाम आणि बळकटीकरण करण्यात आले नसल्याचा आरोप ग्रामस्थांकडून केला जात आहे. परिणामी पावसाच्या प्रारंभीच अनेक ठिकाणी खांब झुकलेल्या अवस्थेत दिसून येत आहेत. या मार्गावरून प्रतिदिन वाहनांची आणि नागरिकांची मोठ्या प्रमाणात ये-जा होत असते. पावसाळ्यात वादळी वारे आणि मुसळधार पाऊस यांमुळे हे खांब रस्त्यावर किंवा वाहनांवर पडून अपघात होण्याची शक्यता निर्माण झाली आहे.