श्री तुळजाभवानी मंदिरातील पुजारी कुटुंबासाठी १० सहस्र रुपये अनुदान द्या !

नगराध्यक्ष सचिन रोचकरी यांचे जिल्हाधिकार्‍यांकडे निवेदन

तुळजापूर (जिल्हा धाराशिव) – येथील श्री तुळजाभवानीदेवीच्या मंदिरातील पुजार्‍यांसाठी लसीकरणाची स्वतंत्र व्यवस्था करण्यासह मंदिर बंद असल्याने अडचणीत असलेल्या पुजारी कुटुंबांना प्रत्येकी १० सहस्र रुपयांचे अनुदान देण्याची मागणी नगराध्यक्ष तथा मंदिर संस्थानचे विश्‍वस्त सचिन रोचकरी यांनी निवेदनाद्वारे २१ मे या दिवशी जिल्हाधिकार्‍यांकडे केली आहे.

निवेदनात म्हटले आहे की, पुजारी बांधवांना लसीकरणासाठी २० सहस्र डोस उपलब्ध करून देण्यात यावेत, तसेच कोरोना संसर्गामुळे गेल्या वर्षभरापासून तुळजाभवानी मंदिर भाविकांसाठी बंद करण्यात आले आहे. त्यामुळे पुजार्‍यांना उत्पन्नाचे साधन उपलब्ध नसून ते आर्थिक अडचणीत आले आहेत. यामुळे पुजारी बांधवांवर उपासमारीची वेळ आली आहे.