सुनेचा छळ केल्याप्रकरणी काँग्रेसचे ज्येष्ठ नेते आणि माजी राज्यमंत्री बाळासाहेब शिवरकर यांच्याविरोधात गुन्हा नोंद

पुणे – मुलाच्या अनैतिक संबंधांचा जाब विचारणार्‍या सुनेचा छळ केल्याप्रकरणी काँग्रेसचे ज्येष्ठ नेते आणि माजी राज्यमंत्री चंद्रकांत तथा बाळासाहेब शिवरकर यांच्यावर वानवडी पोलीस ठाण्यात घरगुती हिंसाचार कायद्याच्या अंतर्गत गुन्हा नोंद करण्यात आला आहे. शिवरकर यांची सून स्नेहा शिवरकर यांनी या प्रकरणी तक्रार केली होती. पतीच्या अनैतिक संबंधाचा जाब विचारल्यामुळे शिवरकर कुटुंबियांनी शारीरिक आणि मानसिक छळ केल्याचे त्यांनी तक्रारीत म्हटले आहे. स्नेहा यांच्या तक्रारीवरून सासरे बाळासाहेब शिवरकर , पती, सासू आणि नणंद यांच्या विरोधात वानवडी पोलीस ठाण्यात कलम ४९८ अ नुसार गुन्हा नोंद करण्यात आला आहे.