सरसंघचालक मोहन भागवत यांना रुग्णालयातून सोडले

नागपूर – राष्ट्रीय स्वयंसेवक संघाचे सरसंघचालक डॉ. मोहन भागवत यांनी कोरोनावर मात केली आहे. रुग्णालयातून त्यांना सोडण्यात आले आहे. ९ एप्रिल या दिवशी डॉ. भागवत यांच्या शरिरात सर्दी आणि खोकला अशी कोरोनासदृश्य लक्षणे दिसून आली होती. त्यानंतर त्यांची कोरोना चाचणी केल्यावर त्यांना कोरोनाची लागण झाल्याचे निदान झाले होते. त्यानंतर लगेचच त्यांना ‘किंग्स वे’ या खासगी रुग्णालयात भरती करण्यात आले होते. तेथे ७ दिवस उपचार घेतल्यानंतर त्यांचे सर्व अहवाल सामान्य आले. त्यानंतर त्यांना सुुट्टी देण्यात आली.

सर्वांत महत्त्वाचे म्हणजे ‘पॉझिटिव्ह’ होण्याच्या काही दिवसांपूर्वी डॉ. भागवत यांनी कोरोना प्रतिबंधक लसीचा पहिला डोस घेतला होता. पुढील ५ दिवस गृह अलगीकरणात रहाण्याची सूचना आधुनिक वैद्यांनी त्यांना केली आहे. विश्रांतीसाठी ते संघ मुख्यालयात आले आहेत. पुढील काही दिवस ते येथेच विश्रांती घेणार आहेत.