शरद पवार यांनी घेतली एकनाथ शिंदे यांच्या कार्यालयात आमदारांची बैठक !

मुंबई – महाविकास आघाडीचे निर्माते शरद पवार यांनी विधीमंडळात आल्यावर महाविकास आघाडीतील कोणत्या घटक पक्षाच्या कार्यालयात नव्हे, तर चक्क उपमुख्यमंत्री एकनाथ शिंदे यांच्या कार्यालयात पक्षाच्या आमदारांची बैठक घेतली. ८ जुलै या दिवशी शरद पवार विधानभवनात आले होते. विशेष म्हणजे मंत्रीमंडळाची बैठक अर्धवट सोडून उपमुख्यमंत्री एकनाथ शिंदे यांनी स्वत:च्या कार्यालयात येऊन शरद पवार यांचे स्वागत केले.

महाराष्ट्र-कर्नाटक सीमा प्रश्नाविषयी मुख्यमंत्री देवेंद्र फडणवीस यांच्या अध्यक्षतेखाली उच्चाधिकार समितीची बैठक आयोजित करण्यात आली होती. या समितीचे सदस्य म्हणून खासदार शरद पवार विधानभवनात उपस्थित होते. ही बैठक झाल्यावर शरद पवार यांनी स्वत:च्या पक्षांच्या आमदारांची बैठक एकनाथ शिंदे यांच्या कार्यालयात घेतली. या बैठकीला पक्षाचे ज्येष्ठ नेते जयंत पाटील, आमदार जितेंद्र आव्हाड, उत्तम जानकर, रोहित पाटील आणि अभिजीत पाटील उपस्थित होते; मात्र रोहित पवार बैठकीला अनुपस्थित होते.