महाराष्ट्र विधान परिषद उपसभापती निवडणूक १ जुलैला !

मुंबई, २९ जून (वार्ता.) – महाराष्ट्र विधान परिषदेच्या रिक्त असलेल्या उपसभापती पदासाठी आगामी १ जुलै या दिवशी दुपारी १ वाजता निवडणूक पार पडणार आहे. विधान परिषदेत याविषयीची अधिकृत घोषणा करण्यात आली असून सध्याचे संख्याबळ पहाता हे पद महायुतीतील शिवसेनेकेडे जाण्याची दाट शक्यता आहे. या पदावर माजी उपसभापती आणि शिवसेनेच्या आमदार डॉ. नीलम गोर्‍हे, आमदार (डॉ.) श्रीमती मनीषा कायंदे, कृपाल तुमाने, चंद्रकांत रघुवंशी यांची नावे चर्चेत आहेत.

३० जून या दिवशी दुपारी १२ पर्यंत उमेदवारी आवेदन भरता येतील. दुपारी १ वाजता छाननी होईल. निवडणूक १ जुलै या दिवशी दुपारी १ वाजता होईल. विधान परिषदेच्या कामकाजातील नियमांनुसार इच्छुक उमेदवाराला उपसभापती पदासाठी प्रस्तावाची लेखी सूचना विधानमंडळ सचिवालयाचे सचिव डॉ. विलास आठवले यांच्याकडे जमा करावी लागेल. डॉ. गोर्‍हे या माजी उपसभापती असून त्यांच्याकडे सभागृहाचे कामकाज चालवण्याचा अनुभव आहे. त्यामुळे त्या पुन्हा एकदा या पदाच्या दावेदार मानल्या जात आहेत.