शिक्षक पात्रता परीक्षेच्या प्रश्नपत्रिका फोडणार्‍यांना लागणार ‘मकोका’ !

मुंबई, २९ जून (वार्ता.) – शिक्षक पात्रता परीक्षेच्या प्रश्नपत्रिका फोडणार्‍यांना मकोका (महाराष्ट्र संघटित गुन्हेगारी नियंत्रण अधिनियम) लावण्यात येणार आहे. यासाठी कायद्यामध्ये आवश्यक तो पालट करण्यात येणार आहे, अशी माहिती शालेय शिक्षण मंत्री दादा भुसे यांनी विधानसभेत दिली. २९ जून या दिवशी दादा भुसे यांनी याविषयी विधानसभेत निवेदन केले. यासह प्रश्नपत्रिका फुटीचे प्रकार घडू नयेत, यासाठी शिक्षक पात्रता परीक्षेसह अन्य परीक्षाही ऑनलाईन घेण्याच्या दृष्टीने कार्यपद्धती निश्चित करण्यासाठी राज्याचे मुख्य सचिव यांच्या अध्यक्षतेखाली समिती स्थापन करण्यात येणार आहे, असे दादा भुसे यांनी सभागृहात सांगितले.

या वेळी भाजपचे आमदार सुधीर मुनगंटीवार म्हणाले, ‘‘शिक्षक पात्रता परीक्षा महाराष्ट्रात असतांना त्याच्या प्रश्नपत्रिका मात्र आग्रा येथे छापण्यात आल्या, असे समजते. असे असेल, तर प्रश्नपत्रिका महाराष्ट्रात का छापल्या जात नाहीत ? यापुढे प्रश्नपत्रिका महाराष्ट्रातच छापण्यात याव्यात.’’