नागपूरच्या विद्यार्थ्याला दिले अबूधाबीचे परीक्षा केंद्र !

नागपूर – राष्ट्रीय परीक्षा संस्थेने २१ जून या दिवशी होणार्‍या ‘नीट’ फेरपरीक्षेपूर्वी नागपूरच्या विद्यार्थ्याच्या प्रवेशपत्रावर संयुक्त अरब अमिरातीमधील अबूधाबी हे परीक्षा केंद्र दिल्याचे उघड झाले आहे. अब्दुल्लाह असे विद्यार्थ्याचे नाव असून त्याने फेरपरीक्षेसाठी दिलेल्या अर्जात नागपूर, वर्धा आणि भंडारा हे पर्याय निवडले होते. केवळ एक दिवसांत पारपत्र आणि व्हिसा यांची प्रक्रिया कशी होणार ?, हा प्रश्न असल्याने विद्यार्थी आणि त्याचे पालक चिंतेत आहेत. शैक्षणिक वर्ष वाया जाण्याची भीतीही विद्यार्थ्याने व्यक्त केली. पालकांनी तातडीने संस्थेच्या साहाय्य क्रमांकावर तक्रार प्रविष्ट (दाखल) केली. संबंधित अधिकार्‍यांनी तांत्रिक चूक झाल्याचे मान्य करून पडताळणीनंतर सुधारित प्रवेशपत्र देण्याचे आश्वासन दिले आहे. माजी शिक्षणमंत्री डॉ. अनीस अहमद यांनी या प्रकरणी तीव्र खेद व्यक्त केला आहे.