Supreme Court : सर्वोच्च न्यायालयाने राजकीय पक्षांतरांच्या घटनांमध्ये हस्तक्षेप करण्याची मागणी करणारी याचिका फेटाळली

नवी देहली – सर्वाेच्च न्यायालयाने लोकप्रतिनिधींच्या फोडाफोडीच्या प्रकरणात प्रविष्ट (दाखल) करण्यात आलेली याचिका फेटाळून लावली. सर्वोच्च न्यायालयाने स्पष्ट शब्दांत म्हटले की, ही याचिका अस्पष्ट, सर्वसाधारण आणि बेछूट आरोपांवर आधारित आहे. या आरोपांना पाठिंबा देणारे कोणतेही ठोस साहित्य किंवा पुरावे समोर ठेवण्यात आलेले नाहीत. त्यामुळे या याचिकेवर विचार करण्याचे कोणतेही कारण नाही.

या याचिकेमुळे अलीकडच्या काळात विविध राज्यांमध्ये झालेल्या राजकीय पक्षांतरांच्या घटनांच्या पार्श्वभूमीवर महत्त्वाची चर्चा चालू  झाली होती.
के.के. रमेश नावाच्या याचिकाकर्त्याने ही याचिका प्रविष्ट केली होती. या याचिकेत राज्यांमधील सत्ताधारी पक्षांकडून विरोधी पक्षांचे आमदार आणि खासदार यांना पैशांचे आमीष दाखवून, दबाव आणून किंवा इतर मार्गांद्वारे पक्षांतर करण्यास भाग पाडले जात असल्याचा दावा करण्यात आला होता. यात न्यायालयाने हस्तक्षेप करून अशा कथित प्रकारांवर नियंत्रण आणावे, अशी मागणी याचिकेत करण्यात आली होती. याचिकेत कोणत्या राज्यात, कोणत्या नेत्याने किंवा कोणत्या घटनेत कथित अपप्रकार घडले ?, यांविषयी कोणतीही ठोस माहिती देण्यात आलेली नव्हती.