Bhagwant Mann : ‘अकाल तख्त’ने पंजाबचे मुख्यमंत्री मान यांना ठरवले ‘गुरु द्रोही’ !

अमृतसर (पंजाब) – पंजाबचे मुख्यमंत्री भगवंत मान यांना ‘अकाल तख्त’कडून  ‘गुरु द्रोही’ (गुरूंचे विरोधी) आणि ‘खालसा पंथ विरोधी’ ठरवण्यात आले आहे. अकाल तख्त हे शिखांचे सर्वोच्च धार्मिक आणि सर्वोच्च पीठ आहे. अकाल तख्तने राज्यातील सर्व शिख आमदार आणि पंजाब सरकारचे मंत्रीमंडळ यांना एका धर्मनिंदाविरोधी कायद्याच्या संदर्भात २९ जून या दिवशी अकाल तख्तसमोर उपस्थित रहाण्याचे समन्स प्रसारित केले आहे. अमृतसरमध्ये ‘पाच सिंह साहिबान’ (शीख धर्मगुरु) यांच्यात बैठक झाल्यानंतर अकाल तख्तचे जथेदार ग्यानी कुलदीप सिंह गरगज्ञ यांनी ‘फसील’वरून (अकाल तख्तच्या व्यासपिठावरून) हा आदेश सुनावला.

काय आहे प्रकरण ?

अकाल तख्तच्या म्हणण्यानुसार एका व्हिडिओमध्ये मुख्यमंत्री मान शीख गुरूंच्या चित्रांवर मद्य शिंपडतांना दिसतात. याला शीख धार्मिक भावनांचा अपमान मानण्यात आले. मुख्यमंत्री मान यांनी हा व्हिडिओ कृत्रिम बुद्धीमत्ता (एआय) वापरून बनवलेला असल्याचे सांगितले. अकाल तख्तने त्यांना या दाव्याचा पुरावा मागितला; परंतु ‘आवश्यक माहिती किंवा प्रयोगशाळांची नावे त्यांनी दिली नाहीत’, असे अकाल तख्तचे म्हणणे आहे.

अकाल तख्तने सांगितले की, भारत सरकारमान्य दोन प्रयोगशाळांकडून पडताळणी करून घेतली असता व्हिडिओ बनावट किंवा एआयनिर्मित नसल्याचे निष्पन्न झाले. त्यानंतर मान यांनी अकाल तख्तसमोर चुकीची माहिती दिली, असा निष्कर्ष काढण्यात आला.