गणेशोत्सवापूर्वी मुंबई महापालिकेकडून विसर्जन स्थळांवर सिद्धता चालू !

मुंबई – मुंबईतील आगामी गणेशोत्सव आणि इतर सण यांच्या कालावधीत समुद्रातील विसर्जन स्थळांवर भाविक, तसेच जीवरक्षक यांच्या सुरक्षिततेसाठी महानगरपालिकेने सिद्धता चालू केली आहे. विसर्जनाच्या वेळी समुद्रातील पाण्याचा अंदाज यावा आणि दुर्घटना टळाव्यात, यासाठी ओहोटीच्या रेषेवर ‘मरीन नॅव्हिगेशन बॉयज’ (समुद्री मार्गदर्शक तरंगते गोळे) आणि ‘सोलर लँटर्न’ (सौर कंदील) बसवण्याचा निर्णय पालिकेने घेतला आहे. या यंत्रणेचा पुरवठा करणे, देखरेख ठेवणे आणि विसर्जन प्रक्रियेनंतर ती काढणे या ३ वर्षांच्या कंत्राटासाठी पालिकेच्या पर्यावरण आणि हवामान पालट विभागाने ऑनलाईन ई-निविदा मागवल्या आहेत.

चौपाट्यांवर रात्रीच्या किंवा भरती-ओहोटीच्या वेळी समुद्रातील पाणी आणि खोली यांचा अंदाज न आल्याने दुर्घटना घडतात. समुद्रातील ‘मरीन नॅव्हिगेशन बॉयज’ हे विसर्जन कक्ष आणि ओहोटी यांच्या रेषेची अचूक सीमा दर्शवतील. त्यामुळे भाविकांना सुरक्षिततेची मर्यादित रेषा ओळखता येईल. त्यावर रात्री चमकणारे अत्याधुनिक सोलर दिवे बसवले जाणार आहेत. ते अंधारातही दिसू शकतात. आपत्कालीन परिस्थितीत जीवरक्षक आणि नौदलाच्या बोटी विसर्जन क्षेत्रात गस्त घालणार असल्याने अधिक सोपे होणार आहे.