विशाळगडावरील ४८ न्यायप्रविष्ट अतिक्रमणांना न्यायालयीन सुनावणीत ‘दिनांकावर दिनांक’ : प्रत्यक्षात कारवाई कधी ? 

‘सनातन प्रभात’ विशेष वृत्त ! 

कोल्हापूर, ११ जून (वार्ता.) – विशाळगडावर असलेल्या अतिक्रमणांच्या विरोधात जुलै २०२४ मध्ये शिवभक्तांचा उद्रेक झाल्यावर प्रशासनाने ही अतिक्रमणे हटवण्यास प्रारंभ केला. याच कालावधीत येथील एकूण झालेल्या उद्रेकांच्या संदर्भात, तसेच अतिक्रमणांवर कारवाई न होण्यासाठी काही जण मुंबई उच्च न्यायालयात गेले. वर्ष २०२४ पासून गडावर असलेल्या १५८ अतिक्रमणांपैकी एकूण ११० अतिक्रमणे हटवण्यात आली. उर्वरित ४८ न्यायप्रविष्ट अतिक्रमणांना न्यायालयीन सुनावणीत ‘दिनांकावर दिनांक’ पडत असून प्रत्यक्षात या अतिक्रमणांवर कारवाई कधी होणार आणि गड अतिक्रमणमुक्त कधी होणार ? हा प्रश्न कोल्हापूर जिल्ह्यातील आणि राज्यातील सर्व गडकोटप्रेमींना पडला आहे.

१. छत्रपती शिवाजी महाराज यांच्या पदस्पर्शाने पावन झालेल्या विशाळगडाच्या पायथ्याशी १५८ अतिक्रमणे होती. यात दुकाने, घरे, तसेच अनेकांनी व्यवसाय उभारले होते. मार्च २०२१ मध्ये सर्वप्रथम ‘विशाळगड रक्षण आणि अतिक्रमणविरोधी कृती समिती’ आणि हिंदु विधीज्ञ परिषदेने या संदर्भातील सर्व वस्तूस्थिती कोल्हापूर येथे पत्रकार परिषद घेऊन मांडली अन् या प्रकरणाला वाचा फोडली. यानंतर या प्रकरणी सातत्याने आंदोलन, निवेदन, पत्रकार परिषद, आमदार-खासदार भेटी, विधानसभेत आवाज उठवणे यांसह अन्य कृती करण्यात आल्या.

२. या संदर्भात अन्य गडकोट संघटना, तसेच हिंदुत्वनिष्ठ संघटना यांनीही वेळोवेळी निवेदन, आंदोलन या माध्यमातून वाचा फोडली होती.

३. पावसाळा आला की, शासनाच्या नियमानुसार कोणतेही अतिक्रमण काढता येत नाही. त्यामुळे आता पावसाळा चालू झाला असून अनुमाने ४ महिने कोणतीच कारवाई होणार नाही, हे जवळपास निश्चित असून अतिक्रमणांचे घोंगडे परत एकदा भिजत पडणार हे निश्चित !