Prime Minister Narendra Modi : निवडून आलेले आणि १२ वर्षे पदावर राहिलेले नरेंद्र मोदी पहिले पंतप्रधान !

नवी देहली – अनुमाने ४० वर्षांच्या प्रभावी राजकीय कारकीर्दीनंतर नरेंद्र मोदी निवडून आलेले आणि सर्वाधिक काळ, म्हणजे १२ वर्षे सलगपणे पदभार सांभाळणारे भारताचे पहिले पंतप्रधान बनले आहेत. या निमित्ताने देश-विदेशातील नेत्यांनी पंतप्रधान मोदी यांना शुभेच्छा दिल्या.

पंतप्रधान मोदी यांनी १० जून या दिवशी पंतप्रधान म्हणून एकूण ४ सहस्र ३९९ दिवस पूर्ण केले. त्यांनी जवाहरलाल नेहरू यांचा ४ सहस्र ३९८ दिवसांचा पंतप्रधानपदी राहिल्याचा विक्रम मोडला. मे २०१४ मध्ये पंतप्रधानपदाचा कार्यभार स्वीकारण्यापूर्वी पंतप्रधान मोदी यांनी जवळपास १३ वर्षे गुजरातचे मुख्यमंत्री म्हणून काम पाहिले होते. यामुळे काही दिवसांपूर्वीच त्यांनी सर्वाधिक काळ, म्हणजे २५ वर्षांहून अधिक सरकारचे प्रमुख राहिल्याचा विक्रम नोंदवला होता.

पंतप्रधान मोदी यांच्या पंतप्रधानपदाच्या कार्यकाळात अनेक ऐतिहासिक निर्णय घेण्यात आले. यामध्ये नोटाबंदी, भारतीय राज्यघटनेतील कलम ३७० रहित करणे,  उरी सर्जिकल स्ट्राईक, बालाकोट स्ट्राईक आणि ऑपरेशन सिंदूर यांसारख्या निर्णयांचा समावेश आहे. कोरोना महामारी आणि विविध युद्धे यांसारख्या जागतिक आव्हानांच्या काळातही पंतप्रधान मोदी यांनी देशाचे यशस्वी नेतृत्व केले.

जागतिक नेत्यांकडून अभिनंदनाचा वर्षाव !

१. पंतप्रधान मोदी यांचे अभिनंदन ! अलीकडच्या काही आठवड्यांत रोममध्ये पुन्हा भेटणे आणि आपल्या राष्ट्रांसाठी नवीन संधी निर्माण करण्याच्या दृष्टीने भविष्याचा वेध घेणार्‍या ‘विशेष धोरणात्मक भागीदारी’चा संयुक्तपणे शुभारंभ करणे, हा एक आनंददायी अनुभव होता. – जॉर्जिया मेलोनी, पंतप्रधान, इटली

२. हा टप्पा केवळ तुमच्या कार्यकाळाचाच नव्हे, तर जगातील सर्वांत मोठ्या लोकशाहीतील जनतेने तुमच्या नेतृत्वावर वारंवार दाखवलेल्या विश्‍वासाचाही पुरावा आहे. तुमच्या दूरदृष्टीने भारताच्या सीमांपलीकडे, विशेषतः श्रीलंकेतही अनेकांना प्रेरणा दिली आहे ! – अनुरा कुमारा दिसानायके, राष्ट्राध्यक्ष, श्रीलंका

३. पंतप्रधान मोदी यांची ही कामगिरी त्यांच्या अनेक वर्षांच्या समर्पित जनसेवेचा आणि भारताचा विकास, समृद्धी अन् जागतिक स्तरावरील प्रतिष्ठा उंचावण्यातील त्यांच्या नेतृत्वाचा पुरावा आहे. – अन्वर इब्राहिम, पंतप्रधान, मलेशिया