पश्चिम महाराष्ट्र देवस्थान व्यवस्थापन समितीच्या प्रशासकपदी जिल्हाधिकार्‍यांची नियुक्ती !

कोल्हापूर – ‘पश्चिम महाराष्ट्र देवस्थान व्यवस्थापन समिती’च्या प्रशासकाचा कार्यकाळ ६ एप्रिलला संपुष्टात आला. यानंतर २ महिने पद रिक्त होते. समितीच्या वतीने व्यवस्थापित विविध न्यासांचे दैनंदिन प्रशासकीय, आर्थिक, तसेच न्यायप्रविष्ट कामकाज अखंडित चालू रहाणे आवश्यक आहे. प्रशासकपद रिक्त राहिल्यास कामकाजावर प्रतिकूल परिणाम होण्याची शक्यता असल्याने शासनाने कोल्हापूरचे जिल्हाधिकारी डॉ. विजय राठोड यांची प्रशासकपदी नियुक्ती केली आहे. समितीची पुनर्रचना होईपर्यंत संबंधित न्यासांच्या स्थावर आणि जंगम मालमत्तेचे संरक्षण, संवर्धन अन् व्यवस्थापन अबाधित रहावे, यांसाठी हा निर्णय घेण्यात आला. जिल्हाधिकार्‍यांची ही नियुक्ती समितीची पुनर्रचना होईपर्यंत अथवा शासनाच्या पुढील आदेशापर्यंत कायम रहाणार असून सदर आदेश तात्काळ प्रभावाने लागू करण्यात आला आहे.