गोपालगंज जिल्ह्यातील एकाच हिंदु कुटुंबातील ४ जणांवर आक्रमण

गोपालगंज (बांगलादेश) – जिल्ह्यातील काशियानी येथे अल्पसंख्यांक हिंदु कुटुंबातील ४ सदस्यांवर आक्रमण करण्यात आल्याची माहिती ‘बांगलादेश मायनॉरिटी वॉच’ या संघटनेने दिली. हे आक्रमण शेजारील मुसलमान कुटुंबाशी राष्ट्रीय निवडणुकीतील मतदानावरून झालेल्या जुन्या वादातून झाल्याचे सांगण्यात येत आहे. शेजारी रहाणारा अजिबर मोल्ला हा युनियन परिषदेचा सदस्य असून त्याने साथीदारांसह हिंदु कुटुंबावर काठ्या आणि स्थानिक बनावटीची शस्त्रे यांद्वारे आक्रमण केले.

ही घटना गोपालगंज जिल्ह्यात असलेल्या काशियानी उपजिल्ह्यातील बेथुरी युनियन अंतर्गत येणार्‍या रामडिया ईस्ट पारा गावात २५ जूनच्या दुपारी घडली. घायाळांमध्ये क्षितीश बिस्वास (वय ६५ वर्षे), त्यांची पत्नी तुळशी बिस्वास (वय ५० वर्षे), मुलगी इति राणी बिस्वास (वय ३० वर्षे) आणि त्यांचा नातू देबराज बिस्वास (वय १५ वर्षे) यांचा समावेश आहे. या प्रकरणी पोलीस ठाण्यात लेखी तक्रार करण्यात आली आहे.