श्री सिद्धिविनायक मंदिर सुशोभीकरण प्रकल्पामुळे परिसराला मिळणार नवे रूप ! – मुख्यमंत्री

मुंबई – श्री सिद्धिविनायक मंदिरात येणार्‍या भाविकांना सुलभ आणि अल्प वेळेत सिद्धिविनायकाचे दर्शन झाले पाहिजे. मंदिर परिसरात पायाभूत सुविधांची कामे करण्यात येत आहे. त्याचाच भाग म्हणून मंदिर परिसराचे सुशोभीकरण प्रकल्प हाती घेण्यात आला आहे. या प्रकल्पाच्या पूर्णत्वामुळे श्री सिद्धिविनायक मंदिर परिसराला नवे रूप मिळणार आहे, असे मुख्यमंत्री देवेंद्र फडणवीस यांनी म्हटले. प्रकल्पाच्या पहिल्या टप्प्यातील कामांचे भूमीपूजन मुख्यमंत्र्यांच्या हस्ते करण्यात आले. या वेळी ते बोलत होते. या वेळी उपमुख्यमंत्री एकनाथ शिंदे, ‘श्री सिद्धिविनायक गणपति मंदिर न्यासा’चे अध्यक्ष (राज्यमंत्री दर्जा) सदानंद सरवणकर, महापौर सौ. रितू तावडे, सिद्धिविनायक मंदिर न्यासाचे कोषाध्यक्ष आचार्य पवन त्रिपाठी यांच्यासह न्यासाचे विश्वस्त उपस्थित होते.