‘कॉकरोच जनता पार्टी’ विषयाकडे भावूक होऊन पाहू नका ! – CJI Surya Kant

नवी देहली – सरन्यायाधीश सूर्यकांत यांच्या विधानाचा चुकीचा अर्थ काढून सामाजिक माध्यमांवर ‘कॉकरोच जनता पार्टी’ स्थापन करून न्यायालयाची नाहक अपकीर्ती केली जात असल्याचा दावा करत सर्वोच्च न्यायालयात जनहित याचिका प्रविष्ट करण्यात आली होती. न्यायालयाने मात्र या याचिकेवर तातडीने सुनावणी घेण्यास नकार दिला आहे. ‘या विषयाकडे इतके भावूक होऊन पाहू नका’, असा सल्ला सरन्यायाधिशांनी अधिवक्त्यांना दिला.

१५ मे या दिवशी एका सुनावणीच्या वेळी सरन्यायाधीश सूर्यकांत यांनी न्यायालयीन यंत्रणेवर चिखलफेक करणार्‍या प्रवृत्तींवर कडक शब्दांत ताशेरे ओढले होते. ते म्हणाले होते की, समाजात असे काही परजीवी आहेत, जे सातत्याने व्यवस्थेवर आक्रमणे करत असतात. तुम्हाला त्यांच्याच पंगतीला जाऊन बसायचे आहे का ? काही तरुण हे ‘कॉकरोच’सारखे (झुरळासारखे) असतात, ज्यांना कायद्याच्या क्षेत्रात किंवा इतर कुठेही काम मिळत नाही; मग असे लोक पत्रकारिता, सामाजिक माध्यम किंवा माहिती अधिकार  कार्यकर्ते बनतात आणि सर्वांवरच चिखलफेक करू लागतात.