पुणे येथील ‘मॉडर्न विद्यालया’च्या प्राचार्य अन् संस्थाचालक यांवर कारवाई करा !

पुणे – ‘राष्ट्रीय पात्रता सह प्रवेश परीक्षे’ची (‘नीट’ची) प्रश्नपत्रिका फुटल्याप्रकरणी पुण्यातील ‘मॉडर्न कला, विज्ञान आणि वाणिज्य महाविद्यालया’तील शिक्षिका मनीषा मांढरे यांना अटक झाली. संबंधित शैक्षणिक संस्थेची मान्यता रहित करावी, संस्थाचालकांसह प्राचार्यांवर कारवाई करावी, अशी मागणी महापालिकेच्या सर्वसाधारण सभेत ‘महाविकास आघाडी’तील राष्ट्रीय काँग्रेस, शरद पवार गट, ठाकरे गटाचे नगरसेवक यांनी आक्रमक भूमिका घेत आंदोलनाद्वारे केली.

१. महापालिकेची सर्वसाधारण सभा चालू होताच राष्ट्रीय काँग्रेसचे गटनेते रामचंद्र कदम आणि शरद पवार गटाचे काका चव्हाण यांच्या नेतृत्वाखाली नगरसेवकांनी सभागृहात आंदोलन चालू केले.

२. ‘हा विषय केंद्र सरकारशी संबंधित आहे. ‘केंद्रीय गुप्तचर विभागा’कडून त्याचे अन्वेषण चालू आहे. नगरसेवकांनी आंदोलन करू नये’, अशी विनंती महापालिकेतील भाजपचे सभागृह नेते गणेश बीडकर यांनी केली. त्याकडे दुर्लक्ष करून विरोधकांनी सभागृहात जोरदार आंदोलन केले.

३. ‘नीट’ प्रश्नपत्रिका फुटल्याचे प्रकरण आणि त्यानंतर ४ विद्यार्थ्यांनी आत्महत्या केल्याच्या निषेधार्थ सर्वसाधारण सभा तहकूब करावी, असा प्रस्ताव विरोधकांनी केला. या प्रस्तावाला गणेश बीडकर यांनी विरोध करून मतदानाने हा प्रस्ताव फेटाळून लावला. या वेळी राष्ट्रवादी काँग्रेस पक्षाच्या नगरसेवकांनी तटस्थ भूमिका घेतली.

४. ‘मॉडर्न महाविद्यालया’च्या प्राचार्या डॉ. निवेदिता गजानन एकबोटे या पुणे महानगरपालिका प्रभाग क्र. ‘१२ ड’ मधून भाजपच्या विद्यमान नगरसेविका आहेत. त्यांच्या नगरसेवक पदाच्या त्यागपत्राची मागणी विरोधकांनी केली.