पुराची माहिती मिळण्यासाठी २ विशेष ड्रोन जिल्हा आपत्ती व्यवस्थापनाकडे

कोल्हापूर, १६ मे (वार्ता.) – कोल्हापूर जिल्ह्यात येणार्‍या पुराची नेमकी माहिती कळावी, यांसाठी अत्याधुनिक असे २ ड्रोन जिल्हा आपत्ती व्यवस्थापनास प्राप्त झाले आहेत. यातील एक हवेतून उडणारा आहे, तर दुसरा पाण्याखाली जाऊन तेथील माहिती गोळा करणार आहे. पाण्याखाली असणार्‍या ‘ड्रोन’चे साहाय्य प्रामुख्याने पुराच्या काळात पाण्यात असलेले साप, तसेच जलचर यांची हालचाल ओळखण्यासाठी होणार आहे. याचे नियंत्रण जिल्हा व्यवस्थापन केंद्रातून करता येईल अशी व्यवस्था आहे, अशी माहिती जिल्हा आपत्ती केंद्रातून देण्यात आली.

याच समवेत पुराच्या पाण्यात काम करतांना साप चावला, तरी काही होणार नाहीत असे १२ विशेष कीट (कपडे) जिल्हा प्रशासनास प्राप्त झाले आहेत. यामुळे पुराच्या पाण्यात आता सापांची अथवा तत्सम विषारी जलचरांची भीती रहाणार नाही. आपत्ती व्यवस्थापनाच्या वतीने पूर्वी घेतलेल्या ‘हॅम रेडिओ’च्या कक्षेत वाढ करून आता शिरोळ तालुकाही त्यात समाविष्ट करण्यात आला आहे.