ठाणे जिल्हा परिषदेचे लाचखोर अधिकारी कह्यात !

ठाणे, २३ एप्रिल (वार्ता.) – ठाणे जिल्हा परिषदेच्या शिक्षण विभागातील २ अधिकार्‍यांना २० सहस्र रुपयांची लाच घेतल्याप्रकरणी लाचलुचपत प्रतिबंधक विभागाने कह्यात घेतले आहे. शंकर सोमनाथ आरे (वय ४४ वर्षे) आणि श्रीकांत अनंत खंडागळे (वय ५६ वर्षे) अशी अधिकार्‍यांची नावे आहेत. (अशा लाचखोरांची सर्व संपत्ती जप्त करून त्यांना कठोर शिक्षा करायला हवी. – संपादक) एका निवृत्त शिक्षकावरील विभागीय चौकशी बंद करून सेवानिवृत्तीचा लाभ घेण्यासाठी त्यांनी एकूण १ लाख रुपयांची मागणी केली होती. त्यांपैकी ८० सहस्र रुपये आधीच घेतले होते. २२ एप्रिलला उर्वरित २० सहस्र रुपये घेतांना आरे यांना कह्यात घेण्यात आले. खंडागळे यांचाही सहभाग उघड झाला असून दोघांविरोधात पुढील कारवाई चालू आहे.