नागपूर येथे वाठोडा पोलीस ठाण्यातील लाचखोर महिला उपनिरीक्षक कह्यात !

नागपूर – वाठोडा पोलीस ठाण्यात कार्यरत असलेल्या महिला पोलीस उपनिरीक्षक प्रणाली बेनके यांना लाचलुचपत प्रतिबंधक विभागाने लाचखोरीप्रकरणी कह्यात घेतले आहे. एका व्यक्तीला छेडछाडीच्या खोट्या प्रकरणात अडकवण्याची भीती दाखवून कारवाई न करण्यासाठी खासगी मध्यस्थाच्या माध्यमातून लाच मागितल्याचा गंभीर आरोप त्यांच्यावर आहे. (पोलीस प्रशासनातील लाचखोरीमुळे जनतेचा पोलिसांवरील विश्वास उडाल्यास नवल ते काय ? – संपादक) प्रथम त्यांनी ३० सहस्र रुपये लाच मागितली होती.

तडजोडीअंती १० सहस्र रुपये वाठोडा पोलीस ठाण्यातच स्वीकारण्याचे ठरले. त्यानंतर तक्रारदाराने लाचलुचपत प्रतिबंधक विभागाकडे तक्रार केली. कारवाईच्या वेळी संशय आल्याने महिला अधिकार्‍याने ऐनवेळी लाच स्वीकारली नाही; पण लाचेची मागणी सिद्ध झाल्यामुळे वरील कारवाई करण्यात आली.