‘बुद्ध गार्डन’ येथे झालेल्या अवैध वृक्षतोडीच्या संदर्भात संबंधित ठेकेदारावर गुन्हा नोंद करा !

कोल्हापूर, ९ एप्रिल (वार्ता.) – ‘बुद्ध गार्डन’ येथील के.एम्.टी. वर्कशॉप येथे ‘इलेक्ट्रिक बस’साठी ‘चार्जिंग केंद्र’ बनवण्यासाठी महापालिकेची अनुमती न घेता वृक्षतोड करण्यात आली. वृक्ष तोडतांना ठेकेदाराने ८३० झाडे लावणे अपेक्षित असतांना त्यांपैकी एकही झाड लावले नाही, तसेच अनामत रक्कम ४ लाख १५ सहस्र रुपये जमा करणे अपेक्षित असतांना ती भरली नाही. तरी या प्रकरणी संबंधित ठेकेदारावर गुन्हा नोंद करावा, अशा मागणीचे निवेदन हिंदु विधीज्ञ परिषदेच्या वतीने कोल्हापूर महापालिकेच्या महापौर सौ. रूपाराणी निकम आणि महापालिका आयुक्त राजेंद्र भारूड यांना देण्यात आले. (असे निवेदन का द्यावे लागते ? – संपादक) निवेदन स्वीकारल्यावर दोघांनीही ‘या संदर्भात योग्य ती कार्यवाही करण्यात येईल’, असे आश्वासन दिले. या प्रसंगी अधिवक्ता समीर पटवर्धन, हिंदु विधीज्ञ परिषदेचे अध्यक्ष अधिवक्ता वीरेंद्र इचलकरंजीकर, अधिवक्त्या प्रीती पाटील, अधिवक्ता प्रदीप पुजारी, श्री. बाबासाहेब भोपळे उपस्थित होते.

या संदर्भात श्री. बाबासाहेब भोपळे म्हणाले, ‘‘अशी वृक्षतोड सामान्य नागरिकाने केल्यास महापालिका प्रशासन त्यांच्यावर तात्काळ कारवाई करते. याउलट या प्रकरणी १ वर्ष उलटूनही संबंधित ठेकेदारावर महापालिकेने कोणतीही कारवाई केलेली नाही. त्यामुळे सामान्य नागरिकाला एक न्याय आणि ठेकेदार, तसेच संबंधित महापालिका अधिकारी यांच्यासाठी वेगळा न्याय का ?’’