Women Reservation Bill : महिला आरक्षण सुधारणा प्रारूपाला (मसुद्याला) केंद्राची संमती

नवी देहली – पंतप्रधान नरेंद्र मोदी यांच्या अध्यक्षतेखाली नुकत्याच झालेल्या मंत्रीमंडळाच्या बैठकीत नारी शक्ती वंदन अधिनियमातील सुधारणा विधेयकाच्या प्रारूपाला संमती देण्यात आली. या प्रस्तावानुसार लोकसभेच्या जागा सध्याच्या ५४३ वरून वाढवून ८१६ केल्या जातील आणि त्यांपैकी २७३ जागा महिलांसाठी आरक्षित असतील.

सरकारने अर्थसंकल्पीय अधिवेशनाचा कालावधी वाढवून १६ ते १८ एप्रिलपर्यंत संसदेचे विशेष अधिवेशन बोलावले आहे. या अधिवेशनात महिला आरक्षण सुधारणा विधेयक संमत होण्याची शक्यता आहे. संसदेची संमती मिळाल्यानंतर हा कायदा ३१ मार्च २०२९ पासून लागू होईल. त्याच वर्षी होणार्‍या लोकसभा निवडणुका आणि काही राज्यांच्या विधानसभा निवडणुकांमध्ये तो पहिल्यांदाच लागू होईल. या प्रस्तावानुसार अनुसूचित जाती आणि जमातींच्या आरक्षित जागांमध्येही महिलांसाठी वाटा निश्चित केला जाईल.