लातूर जिल्ह्यात ५२ भोंदूबाबा असल्याचा अंनिसचा दावा !

लातूर – जिल्ह्यात चमत्कार, जादूटोणा, काळी जादू, ज्योतिष किंवा अध्यात्म यांच्या नावाखाली शोषण करणारे ५२ भोंदूबाबा, तांत्रिक, मांत्रिक आहेत. त्यांच्या नावांची सूची ‘महाराष्ट्र अंधश्रद्धा निर्मूलन समिती’ने ३ वेळा पोलीस आणि जिल्हा प्रशासन यांना दिली आहे; मात्र यासंदर्भात अद्याप एकदाही कारवाई झालेली नाही, असा खेद अंनिसच्या वतीने व्यक्त करण्यात आला. ५२ जणांची सूची पुन्हा एकदा देण्यात आली असून त्यांच्यावर कायदेशीररित्या कठोर कारवाई करावी, अशी मागणीही करण्यात आली.

या वेळी समितीचे राज्य अध्यक्ष माधव बावगे म्हणाले की, दैवी शक्ती, चमत्कार, भविष्य, ज्योतिष किंवा अध्यात्म यांच्या नावाखाली देव-धर्माच्या आडून अनेक ठिकाणी लोकांची आर्थिक फसवणूक, मानसिक छळ, तसेच महिलांचे लैंगिक शोषण होण्याच्या घटना समोर येत आहेत. (बावगे यांनी ‘ज्योतिष’ आणि ‘अध्यात्म’ या शब्दांचा वापर करून थेट हिंदु संस्कृतीवरच निशाणा साधला आहे; मात्र अनेक दर्ग्यांमध्ये ‘भूतबाधा’ उतरवण्याच्या नावाखाली महिलांचा होणारा मानसिक आणि शारीरिक छळ, तसेच अघोरी प्रथांविरुद्ध ‘अंनिस’ने किती वेळा पोलिसांना सूची दिली आहे ? – संपादक) अशा घटनांमुळे समाजात बुवाबाजी, अंधश्रद्धा वाढण्याचा आणि गुन्हेगारी प्रवृत्तीला खतपाणी मिळण्याचा धोका निर्माण होत आहे. म्हणून सरकारने जादूटोणाविरोधी कायद्याची प्रभावी कार्यवाही करावी. (ख्रिस्ती मिशनर्‍यांच्या प्रार्थनासभांच्या माध्यमातून असाध्य आजार बरे करण्याच्या भोंदूगिरीविषयी ‘अंनिस’ काही बोलत का नाही ? – संपादक)