सातारा नगर परिषदेच्या घंटागाड्या जकातवाडी ग्रामस्थांनी रोखल्या !

सातारा, २४ मार्च (वार्ता.) – १५ दिवसांपूर्वी सोनगाव ‘कचरा डेपो’ला (कचरा डेपो म्हणजे नगर, शहर येथील कचरा एकत्र करून एका जागी टाकण्याचे ठिकाण) आग लागली होती. जकातवाडी ग्रामस्थांना धुराचा मोठा सामना करावा लागला होता. यामुळे काही काळ तणावाचे वातावरण निर्माण झाले होते. २३ मार्च या दिवशी ग्रामस्थांनी कचरा डेपोतील धुरावर उपाययोजना काढेपर्यंत कचरा डेपोकडे गाड्या न पाठवण्याचा आक्रमक पवित्रा घेत रस्त्यावरच ठिय्या आंदोलन केले. ग्रामस्थांनी केलेल्या या कृतीमुळे सकाळी वाहतूककोंडी झाली. घटनेची माहिती मिळताच नगराध्यक्ष अमोल मोहिते, उपनगराध्यक्ष अधिवक्ता दत्ता बनकर, आरोग्य सभापती धनंजय जांभळे आणि मुख्याधिकारी विनोद जळक यांनी घटनास्थळी धाव घेतली. या वेळी जकातवाडी ग्रामस्थांनी त्यांची भूमिका ठामपणे मांडत ‘सोनगाव कचरा डेपो’ला विरोध केला. सोनगाव कचरा डेपोवर सीसीटीव्ही छायाचित्रक लावणे, येथील भटक्या कुत्र्यांचा बंदोबस्त करणे, कचरा डेपोतील दूषित पाणी गटारांद्वारे ओढ्यात सोडणे, धुराचा बंदोबस्त होईपर्यंत डेपोमध्ये कचरा टाकण्यात येऊ नये अशा विविध मागण्या ग्रामस्थांनी केल्या. (अशा मागण्या का कराव्या लागतात ? प्रशासनाला ते लक्षात येत नाही का ? – संपादक)