गोव्यात वेश्याव्यवसायाशी संबंधित ५१२ संकेतस्थळे बंद केली ! – मुख्यमंत्री डॉ. प्रमोद सावंत

सर्व संकेतस्थळे सायबर फसवणुकीसाठीच

पणजी, ११ मार्च (वार्ता.) – गोव्यात वेश्याव्यवसायाविषयी विज्ञापने देणारी सर्व संकेतस्थळे ही प्रामुख्याने सायबर फसवणुकीसाठीच चालू केलेली असतात आणि ही सर्व संकेतस्थळे राज्याबाहेरून चालवली जातात. राज्यात वेश्याव्यवसायाचे प्रमाण मोठे असल्याचे भासवले जाते; मात्र ते तेवढे मोठे नाही, तरीही पोलीस अशा कृत्यावर कडक कारवाई करत आहेत, अशी माहिती मुख्यमंत्री डॉ. प्रमोद सावंत यांनी ११ मार्च या दिवशी विधानसभेत प्रश्नोत्तर तासाच्या वेळी दिली. विरोधी पक्षनेते युरी आलेमाव यांनी मांडलेल्या लक्षवेधी सूचनेवर मुख्यमंत्री डॉ. प्रमोद सावंत उत्तर देत होते.

डॉ. सावंत पुढे म्हणाले, ‘‘इंटरनेटवर ‘एस्कॉर्ट सर्व्हिस इन गोवा’ असा शोध (सर्च) घेतल्यास अनेक संकेतस्थळे उघडली जातात; मात्र ही सर्व बनावट आहेत. ही संकेतस्थळे बंगाल, महाराष्ट्र, गुजरात, छत्तीसगड ही राज्ये किंवा केनियासारखे देश येथून चालवली जातात. या संकेतस्थळांवर संपर्क केल्यास आधी पैशांची मागणी केली जाते आणि पैसे मिळाल्यानंतर दिलेले संपर्क क्रमांक बंद केले जातात. पोलिसांनी बनावट ग्राहक बनून संपर्क साधून या फसवणुकीची निश्चिती केली. गेल्या २ वर्षांत अशा प्रकारची ५१२ संकेतस्थळे बंद करण्यात आली असून २२ जणांच्या विरोधात प्रथमदर्शनी गुन्हा नोंदवण्यात आला आहे. याखेरीज मानवी तस्करीच्या १६ प्रकरणांमध्ये ३६ जणांना कह्यात घेण्यात आले आहे. या प्रकरणी ४२ महिलांची सुटका करण्यात आली आहे. राज्यात हरवलेल्या मुलामुलींचा शोध लागण्याचे प्रमाण ९० टक्क्यांहून अधिक आहे.’’