पुणे आंतरराष्ट्रीय विमानतळावर विमानाच्या प्रसाधनगृहातून गांजा जप्त !

७४ लाख ५० सहस्र रुपयांचा गांजा

पुणे – बँकॉकहून पुणे आंतरराष्ट्रीय विमानतळावर आलेल्या एका विमानाच्या प्रसाधनगृहात लपवलेला ७४ लाख ५० सहस्र रुपयांचा ‘हायड्रोपोनिक गांजा’ जप्त करण्यात आला. ही कारवाई सीमाशुल्क विभागाच्या पथकाने केली. या प्रकरणात अद्याप कुणालाही अटक करण्यात आलेली नाही.

बँकॉकहून पुण्यातील विमानतळावर ३ मार्च या दिवशी विमान उतरले. विमानातून गांजाची तस्करी होणार असल्याचे सीमाशुल्क विभागाला समजले होते. प्रसाधनगृहात लपवून ठेवलेली ८ पाकिटे सापडली. त्यात ७४५ ग्रॅम ‘हायड्रोपोनिक गांजा’ आढळून आला.

परदेशातून आलेली विमाने देशांतर्गत प्रवासासाठी वापरली जात असल्याची माहिती घेऊन तस्करांनी विमानाच्या प्रसाधनगृहात गांजा लपवला. देशांतर्गत प्रवासात पडताळणी होत नसल्याने विमान दुसर्‍या शहरात पोचल्यानंतर तस्करांनी हा प्रयत्न केल्याची शक्यता सीमाशुल्क अधिकार्‍यांनी व्यक्त केली.