Chandigarh School : चंडीगडमधील शाळा बाँबने उडवण्याचा ई-मेल पुन्हा प्राप्त

चंडीगड – येथील शाळा बाँबने उडवून देण्याच्या ई-मेलद्वारे मिळणार्‍या धमक्यांचे सत्र पुन्हा चालू झाले आहे. शहरातील विवेक हायस्कूल, गुरुकुल भवन विद्यालय आणि इतर अनेक खासगी अन् सरकारी शाळांना असे ई-मेल प्राप्त झाले आहेत. शाळा प्रशासनाने यासंदर्भात तात्काळ पोलिसांना कळवले. धमकीत सांगण्यात आले की, पुढील २ दिवसांत संपूर्ण चंडीगडमध्ये बाँबस्फोट होतील. यामुळे विद्यार्थ्यांनाही घरी पाठवण्यात आले आहे. या ई-मेलमध्ये पंजाब सचिवालय उडवून देण्याच्या धमकीचाही समावेश होता.

प्रकरणाचे गांभीर्य लक्षात घेता, वरिष्ठ पोलीस अधिकारी, बाँब निकामी पथके आणि श्वान पथके घटनास्थळी पोचली. प्राथमिक अन्वेषणात संशयास्पद वस्तू सापडल्या नाहीत. शाळेच्या आजूबाजूच्या परिसरात पहारा वाढवण्यात आला आहे.

पोलीस अधिकार्‍यांच्या म्हणण्यानुसार ज्या ई-मेल पत्त्यावरून धमकी देण्यात आली होती, तो पत्ता पडताळला जात आहे. प्रशासनाने पालकांना अफवांकडे दुर्लक्ष करण्याचे आणि कोणत्याही संशयास्पद हालचालीविषयी पोलिसांना त्वरित माहिती देण्याचे आवाहन केले आहे.