Bhubaneswar Blast : एन्.आय.ए.सुद्धा भुवनेश्वर स्फोटाचे अन्वेषण करणार !

(एन्.आय.ए. म्हणजे नॅशनल इन्व्हेस्टिगेशन एजन्सी, म्हणजेच राष्ट्रीय अन्वेषण यंत्रणा)

भुवनेश्वर (ओडिशा) – गेल्या महिन्यात २७ जानेवारीला येथील सुंदरपाडा परिसरात स्फोट झाला होता. यात ४ जण गंभीर घायाळ झाले होते. या स्फोटाचे अन्वेषण आतापर्यंत केवळ ओडिशा पोलीस करत होते; परंतु आता राष्ट्रीय अन्वेषण यंत्रणेलाही पाचारण करावे लागले आहे. या प्रकरणात अलीकडेच मिळालेल्या नव्या सीसीटीव्ही व्हिडिओतून अनेक गोष्टी समोर आल्या आहेत. यामध्ये स्फोटाची तीव्रता आणि त्यानंतरची गोंधळाची स्थिती स्पष्ट दिसत आहे. तज्ञांच्या मते, या व्हिडिओमुळे स्फोटाचा प्रकार स्पष्ट होईल, तसेच यामागे मोठा कट होता का, याचाही उलगडा होऊ शकतो.

घायाळ झालेल्या चौघांपैकी एक जण सराईत गुन्हेगार होता. त्याच्यापर्यंत इतका शक्तीशाली स्फोटक पदार्थ कसा पोचला, याविषयी राष्ट्रीय अन्वेषण यंत्रणा विशेष तपास करत आहे. स्थानिक पोलीस आणि राष्ट्रीय अन्वेषण यंत्रणा यांची संयुक्त कारवाई या घटनेचा संबंध केवळ स्थानिक गुन्ह्यापुरता मर्यादित नसून सुरक्षेशी निगडित मोठे आव्हान असू शकते, असे संकेत देत आहे.