श्री तुळजाभवानीदेवीच्या मंचकी निद्रेस प्रारंभ !

तुळजापूर, २१ डिसेंबर – श्री तुळजाभवानीदेवीची मंचकी निद्रा २० डिसेंबर या दिवशी चालू झाली. अभिषेक पूजेनंतर तुळजाभवानीदेवी शेजगृहातील चांदीच्या पलंगावर विसावली. तत्पूर्वी सकाळी सेवेकरी पलंगे यांनी देवीचा चांदीचा पलंग स्वच्छ धुवून घेतला आणि पलंगावर नवीन नवार पट्टया बांधून घेतल्या. आता देवीचे सर्व नित्योपचार पलंगावरच होत असून नैवेद्य, अभिषेक हे सर्व धार्मिक विधी परंपरागत पद्धतीने चालू असतात, तर अभिषेक मात्र दही-दुधा ऐवजी सुगंधी तेलाने घालण्यात येतो. देवीची ही निद्रा आता २८ डिसेंबरअखेर चालेल. या दिवशी पहाटे देवी सिंहासनावर परत विराजमान होईल, तसेच दुपारी १२ वाजता घटस्थापनेने शाकंभरी नवरात्रोत्सवास प्रारंभ होईल.