POK Trade : पाकव्याप्त काश्मीर भारताचाच भाग ! – जम्मू-काश्मीर उच्च न्यायालयाचा निर्वाळा

श्रीनगर (जम्मू-काश्मीर) – पाकव्याप्त काश्मीर हा भारताचाच भाग आहे, असा निर्वाळा जम्मू-काश्मीर उच्च न्यायालयाने एका याचिकेवर सुनावणी करतांना दिला. न्यायालयाने म्हटले की, पाकव्याप्त काश्मीर हा भारताचाच भाग असल्यामुळे नियंत्रणरेषेवरून जम्मू-काश्मीर आणि पाकव्याप्त काश्मीर यांच्यात झालेला कोणताही व्यापार हा आंतरराज्य व्यापार समजला जाईल.

काय आहे प्रकरण ?

श्रीनगरमधील राज्य वस्तू आणि सेवा कर अधीक्षकांनी पाकव्याप्त काश्मीर आणि जम्मू-काश्मीर असा व्यापार करणार्‍या व्यापार्‍यांना कारणे दाखवा नोटिसा बजावल्या होत्या. त्याअंतर्गत व्यापार्‍यांना वर्ष २०१७ पासून २०१९ पर्यंत सीमेवरून केलेल्या मालाच्या आवक आणि जावक यांसाठी कर भरण्यास सांगण्यात आले होते. व्यापार्‍यांनी उच्च न्यायालयात याचिका प्रविष्ट (दाखल) करून या नोटिसांना आव्हान दिले होते. त्यावर न्यायालयाने वरील निकाल दिला.