वेण्णालेक बोटचालकांचे आमरण उपोषण !

महाबळेश्वर, १७ सप्टेंबर (वार्ता.) – महाबळेश्वर येथे वेण्णालेक बोट क्लब कार्यरत आहे. येथील बोटचालकांना किमान वेतन मिळत नसल्यामुळे विविध आर्थिक संकटांना सामोरे जावे लागत आहे. काही दिवसांपूर्वी ‘वेण्णाई स्थानिक बोटमन आणि कामगार युनियन’ यांसह भाजप कामगार मोर्चाच्या वतीने पालिका प्रशासनाला विविध मागण्यांचे निवेदन देण्यात आले होते; मात्र यावर कोणतीही उपाययोजना न झाल्यामुळे बोटमन कामगारांच्या वतीने महाबळेश्वर पालिका कार्यालयाबाहेर १५ सप्टेंबरपासून कामगारांनी आमरण उपोषणाला प्रारंभ केला आहे. महाबळेश्वर येथील रहिवासी असलेले राज्याचे उपमुख्यमंत्री एकनाथ शिंदे यांनी लक्ष घालण्याची मागणी करण्यात येत आहे.

महाबळेश्वर येथील वेण्णालेक हे पर्यटकांचे मुख्य आकर्षण आहे. वेण्णालेक येथील व्यवस्थापन महाबळेश्वर नगरपालिकेच्या कह्यात आहे. पालिकेच्या उत्पन्नात महत्त्वाचा वाटा म्हणून ‘वेण्णालेक बोट क्लब’कडे पाहिले जाते. पालिकेच्या आस्थापनात एकूण १३० हून अधिक बोटी असून कायमस्वरूपी बोटचालक म्हणून केवळ ४ कर्मचारीच कार्यरत आहेत. वर्ष २०११ पासून आकृतीबंध अस्तित्वात नाही. तसेच नवीन भरतीही थांबलेली आहे. इतर ५३ जण बोटचालक कंत्राटी स्वरूपात कार्यरत आहेत. कर्मचार्‍यांचा भविष्य निर्वाह निधी कपात होत आहे, तसेच त्यांना ओळखपत्रही देण्यात आली आहेत. असे असूनही त्यांची कायमस्वरूपी नेमणूक करण्यास अडचणी येत आहेत. या प्रकरणाची सध्या कामगार उपायुक्तांकडे सुनावणी चालू आहे.