चंद्रपूर जिल्हा बँक सायबर चोरीची विशेष अन्वेषण पथकाद्वारे चौकशी करू ! – डॉ. पंकज भोयर, राज्यमंत्री

मुंबई, २७ मार्च (वार्ता.) – चंद्रपूर जिल्हा बँकेची यंत्रणा हॅक करून ग्राहकांच्या खात्यातील ३ कोटी रुपयांहून अधिक रक्कम एका अज्ञाताने हरियाणाच्या बँक खात्यामध्ये पाठवली आहे. या प्रकरणात मुख्यमंत्र्यांची अनुमती घेऊन विशेष अन्वेषण पथकाद्वारे चौकशी करण्यात येईल, अशी माहिती राज्यमंत्री डॉ. पंकज भोयर यांनी २५ मार्च या दिवशी विधानसभेत लक्षवेधीच्या उत्तरात दिली. याविषयी भाजपचे सदस्य सुधीर मुनगंटीवार यांनी लक्षवेधी सूचना मांडली होती.

राज्यमंत्री डॉ. भोयर म्हणाले की, बँकेत झालेली नोकरभरती आणि इतर अपव्यवहारांचीही चौकशी होणार आहे. सायबर फसवणुकीला आळा घालण्यासाठी आणि अन्वेषण जलद गतीने करण्यासाठी महाराष्ट्र सायबर सुरक्षा प्रकल्प नवी मुंबई, महापे येथे चालू करण्यात आला आहे. राज्यभरातील सायबर गुन्ह्यांवर नियंत्रण ठेवण्यासाठी येथे सायबर पोलीस स्थानकासह ६ विभाग कार्यरत असतील. हा प्रकल्प अंतिम टप्प्यात असून लवकरच संपूर्णतः कार्यान्वित होणार आहे. हा प्रकल्प राज्यातील सायबर सुरक्षा आणि गुन्हे नियंत्रणासाठी महत्त्वाचा ठरणार आहे.