शिवजयंतीनिमित्त शिवनेरीवर मुख्‍यमंत्र्यांसह मान्‍यवर उपस्‍थित रहाणार !

नारायणगाव (पुणे) – शिवनेरी गडावर साजरा होणार्‍या शिवजयंती सोहळ्‍यासाठी मुख्‍यमंत्री देवेंद्र फडणवीस, उपमुख्‍यमंत्री एकनाथ शिंदे, अजित पवार, पर्यटनमंत्री शंभूराज देसाई, सांस्‍कृतिक कार्यमंत्री आशिष शेलार आदी मान्‍यवर उपस्‍थित रहाणार असल्‍याची माहिती शिवनेरी शिवजयंती महोत्‍सव समितीचे निमंत्रक तथा आमदार शरद सोनवणे यांनी दिली. यंदा सर्व शिवभक्‍तांना विनापास गडावर प्रवेश देण्‍यात येईल, अशी माहिती आमदार शरद सोनवणे यांनी दिली. जुन्‍नर येथे पत्रकार परिषदेत ते बोलत होते.

आमदार शरद सोनवणे म्‍हणाले, ‘‘पारंपरिक शिवजन्‍म सोहळा साजरा करून शिवरायांना मानवंदना देण्‍यात येईल. सकाळी १० ते दुपारी ४ या वेळेत शिवकालीन मर्दानी खेळाची प्रात्‍यक्षिके सादर करण्‍यासाठी जिल्‍ह्यातील प्रमुख पथकांना निमंत्रित केले आहे. सायंकाळी ५ वाजता पर्यटनमंत्री शंभुराज देसाई यांच्‍या हस्‍ते शिवरायांची महाआरती होईल. ६ वाजता सांस्‍कृतिक कार्यमंत्री आशिष शेलार यांच्‍या उपस्थितीत शोभायात्रेचे आयोजन केले आहे.

शिवजयंती निमित्त जुन्‍नर शहरातील परदेशपुरा चौक, तसेच छत्रपती शिवाजी महाराज स्‍मारक येथे उभारण्‍यात येणारे छत्रपती अंबारी त्रिमितीय प्रवेशद्वार, तसेच शिवकालीन शौर्य मावळा प्रवेशद्वार या वर्षीच्‍या महोत्‍सवाचे प्रमुख आकर्षण असणार आहे. या ठिकाणी ‘लेझर अँड लाईट शो’चे देखील आयोजन करण्‍यात आले आहे. रात्री १२ वाजता आमदार शरद सोनवणे यांच्‍या हस्‍ते छत्रपती शिवरायांना मानवंदना, महाआरती आणि ‘फायर शो’चे आयोजन करण्‍यात आले आहे. मुख्‍यमंत्री देवेंद्र फडणवीस, उपमुख्‍यमंत्री एकनाथ शिंदे, अजित पवार यांचे उपस्थितीत सन १९६० सालापासून प्रलंबित असलेल्‍या जुन्‍नर तालुक्‍यातील दार्‍या घाटाच्‍या प्रश्‍नाला गती देण्‍याची मागणी, शिवनेरी गडावरील रोपवे मार्ग, जुन्‍नर तालुक्‍यातून खेतेपठार तसेच बोरघर मार्गे भीमाशंकरला जोडणारा रस्‍ता, आंबेगव्‍हाण येथील बिबट सफारी पार्क, जुन्‍नर तालुक्‍यात प्रवेश करणार्‍या प्रमुख रस्‍त्‍यांवर सी.एस्.आर्. फंडातून ५ महाद्वार उभे करण्‍याचा प्रस्‍ताव मुख्‍यमंत्री देवेंद्र फडणवीस यांना देणार असल्‍याचे आमदार सोनवणे यांनी सांगितले.