फुलंब्रीत आगीत ३ जणांचा मृत्यू !

छत्रपती संभाजीनगर – फुलंब्री शहरातील दरी फाटा येथे छत्रपती संभाजीनगर ते जळगाव या राष्ट्रीय महामार्गावर प्लास्टिकच्या दुकानात ९ नोव्हेंबरच्या मध्यरात्री आग लागली. या आगीमध्ये प्लास्टिकचे दुकान पूर्णपणे जळून खाक झाले. या दुकानात बॅटर्‍या आणि जुने भ्रमणभाषसंच होते. आग लागल्याचे कळताच स्थानिक नागरिक गजानन वाघ, राजू पटेल, नितीन नागरे, अजय नागरे, शाहरूख पटेल यांनी दुकानाकडे धाव घेतली. दुकानाचे शटर वर करण्याचा प्रयत्न करतांना स्फोट होऊन पाचही जण दूर फेकले गेले. आगीचा भडका आणि स्फोट यांमुळे गजानन वाघ, राजू पटेल, नितीन नागरे यांचा मृत्यू झाला, तर उर्वरित २ जण गंभीररित्या घायाळ झाले.