मीरारोड येथील गोमांस तस्कर कुरेशी याच्यावर हद्दपारीची कारवाई !

मुंबई – मीरारोड येथील गोमांस तस्कर आणि जनावरे यांचा अवैध विक्रेता कासमअली शरीफ कुरेशी (वय ५३ वर्षे) याला मीरा-भाईंदर पोलिसांनी हद्दपार केले आहे. ठाणे, पालघर, मुंबई, मुंबई उपनगर या भागांतून कुरेशी याला २ वर्षांसाठी हद्दपार करण्यात आले आहे.

वर्ष २०१६ ते २०२४ या कालावधीत मीरारोड येथील नयानगर, काशिगाव, काशिमीरा पोलीस ठाणे परिसर या भागात गोमांसाची तस्करी, अपहरण यांविषयी कुरेशी याच्यावर ७ गुन्हे नोंदवण्यात आले आहेत. या प्रकरणी अटक होऊनही कुरेशी याच्याकडून अवैध गोमांस विक्रीचा धंदा चालूच होता. वर्ष २०२४ मध्येही कुरेशी याच्यावर गोमांस विक्रीप्रकरणी गुन्हे नोंद झाले आहेत. कुरेशी याच्यामुळे मीरारोड परिसरात तणावाचे वातावरण निर्माण झाल्याने त्याच्यावर हद्दपारीची कारवाई करण्यात आली आहे, असे मीरा-भाईंदर पोलीस आयुक्त कार्यालयाकडून काढण्यात आलेल्या प्रसिद्धीपत्रकात म्हटले आहे.