हिंदूंवर होणारे आघात कदापि सहन करणार नाही ! – धनंजय महाडिक, खासदार, भाजप

कोल्हापूर येथील ‘हिंदु धर्म परिषदे’त धर्मरक्षणार्थ १ सहस्र हिंदूंनी घेतली शपथ !

कोल्हापूर, १७ ऑगस्ट (वार्ता.) – विशाळगडावर हिंदूंचा उद्रेक झाल्यावर काही राजकीय लोकांना अल्पसंख्यांकांचा पुळका आला आणि ते तात्काळ त्यांना साहाय्य करण्यासाठी गडावर गेले. याउलट कोल्हापूर शहरात सहलीला आलेल्या विद्यार्थ्यांनी ‘जय श्रीराम’च्या घोषणा दिल्यावर धर्मांधांनी त्यांच्या बसवर दगडफेक केली. तेव्हा त्या हिंदु विद्यार्थ्यांना साहाय्य करण्यासाठी कुणी गेले नाही. चित्रपटसृष्टीच्या माध्यमातून मोठ्या प्रमाणात हिंदु संस्कृतीवर आघात होत आहेत. हिंदूंना शैक्षणिक स्तरावर धर्मशिक्षण दिले जात नाही. या कार्यक्रमाचे आयोजन होणे हे हिंदु समाज जागृत होत असल्याचे द्योतक होय. अशाच प्रकारे हिंदूंनी हिंदु धर्मावर होणार्‍या आघातांच्या विरोधात एकवटले पाहिजे. पुढील काळात हिंदु आणि हिंदु धर्म यांवर आघात होत असतील, तर ते सहन करणार नाही, तसेच हिंदूंच्या केसालाही धक्का लागू देणार नाही, अशी चेतावणी भाजपचे खासदार श्री. धनंजय महाडिक यांनी दिली. ते १७ ऑगस्टला शाहू स्मारक येथे झालेल्या हिंदु धर्म परिषदेत बोलत होते.

या प्रसंगी प.पू. संतोष उपाख्य बाळ महाराज यांनीही उपस्थितांचे दिशादर्शन केले. तसेच ‘स्वातंत्र्यवीर सावरकर यांचे हिंदुत्व आणि आजचे वास्तव’ या विषयावर प्रा. राजेंद्र ठाकूर यांनी, ‘हिंदु धर्मावर होणारे विविध आघात आणि लव्ह जिहाद’ या विषयावर सनातन संस्थेच्या धर्मप्रचारक सद्गुरु स्वाती खाडये यांनी, तर शिवसेनेचे माजी आमदार आणि राज्य नियोजन महामंडळाचे अध्यक्ष श्री. राजेश क्षीरसागर आदी मान्यवरांनीही मार्गदर्शन केले.

देव, देश आणि धर्म यांच्या हितासाठी मांडण्यात आलेल्या १५ ठरावांना परिषदेला उपस्थित १ सहस्रहून अधिक हिंदु धर्मप्रेमींनी अनुमोदन दिले. तसेच त्यांनी धर्मरक्षणाची शपथही घेतली. परिषदेची प्रस्तावना श्री. अंकुश निपाणीकर यांनी केली, तर हिंदु एकता आंदोलनाचे शहराध्यक्ष श्री. गजानन तोडकर यांनी परिषदेचा उद्देश सांगितला. हिंदु जनजागृती समितीचे श्री. बाबासाहेब भोपळे आणि ‘शिवशाही फाऊंडेशन’चे संस्थापक श्री. सुनील सामंत यांनी सूत्रसंचालन केले.

कोल्हापूर येथे हिंदु धर्म परिषदेत मान्यवर वक्त्यांनी व्यक्त केले जाज्वल्य विचार !

रामनाथी (गोवा) येथे जून २०२४ मध्ये झालेल्या ‘वैश्विक हिंदु राष्ट्र महोत्सवा’तील संत आणि मान्यवर वक्त्यांनी केलेले मार्गदर्शन ‘हिंदु धर्म परिषदे’त प्रारंभी दाखवण्यात आले, तसेच या परिषदेच्या निमित्ताने विशेष पद्धतीने सिद्ध केलेला लघुपट (डॉक्युमेंट्री) दाखवण्यात आला. 

हे पुरोगामी कोल्हापूर नसून हिंदुत्वनिष्ठ कोल्हापूर आहे ! – धनंजय महाडिक, खासदार, भाजप

कोल्हापूर शहर हे आजयर्पंत पुरोगामी आहे, असे सांगितले जात होते; मात्र कोल्हापूर हे पुरोगामी नसून ते हिंदुत्वनिष्ठ आहे, असे आपण ठामपणे सांगितले पाहिजे.

We will never tolerate attacks on Hindus! – @dbmahadik, BJP MP

Resolution for the welfare of the Nation and Dharma at the ‘Hindu Dharma Parishad’ in Kolhapur.

Over 1,000 Hindus take an oath to protect their religion. pic.twitter.com/FWWs2hZUBW

— Sanatan Prabhat (@SanatanPrabhat) August 17, 2024

हिंदूंच्या राजकीय लोकप्रतिनिधींनी ठामपणे ‘आम्ही हिंदू आहोत’, अशी भूमिका घेण्याची आवश्यकता ! – प.पू. सद्गुरु उपाख्य बाळ महाराज

हिंदूंचे जे लोकप्रतिनिधी आहेत, त्यांनी आता ठामपणे ‘आम्ही हिंदु आहोत’, अशी भूमिका घेण्याची आवश्यकता आहे. लोकशाही प्रक्रियेत ‘जो हिंदूंचा आहे त्यालाच हिंदूंचे मत’, अशी भूमिका हिंदूंनी घेण्याची वेळ आली आहे. हिंदु धर्म हा लाखो वर्षे प्राचीन असून महाराष्ट्रातील संत रामदासस्वामी, संतश्रेष्ठ ज्ञानेश्वर माऊली आणि जगद्गुरु संत तुकाराम महाराज यांचे समाजावर अनंत उपकार आहेत. हिंदूंनी यापुढील काळात ‘कोणतीही वस्तू हिंदूंकडूनच विकत घेणार’, असा निर्धार केला पाहिजे.

हिंदूंनी आता ‘राजकीय जिहाद’ला प्रत्युत्तर देण्याची सिद्धता ठेवायला हवी ! – राजेश क्षीरसागर, अध्यक्ष, राज्य नियोजन महामंडळ

‘लव्ह जिहाद’, ‘भूमी जिहाद’ यांसह अन्य अशा अनेक जिहादांसमवेत ‘राजकीय जिहाद’ चालू झाला आहे. या ‘राजकीय जिहादा’ला हिंदूंनी प्रत्युत्तर देण्याची सिद्धता ठेवली पाहिजे. जे पक्ष हिंदूंच्या हिताचा विचार करतात त्यांच्या पाठीशी हिंदूंनी ठामपणे उभे राहिले पाहिजे. हिंदूंना धर्मशिक्षण मिळण्यासाठी लहानपणापासून ‘बालसंस्कार’ दिले पाहिजेत, तसेच ‘आई संस्कार’ही देण्याची आज वेळ आली आहे. मुख्यमंत्र्यांना सांगून लवकरच ‘लव्ह जिहाद ’विरोधी कायदा महाराष्ट्रात संमत करू, तसेच यापुढील काळात स्वातंत्र्यवीर सावरकर यांना ‘भारतरत्न’ देण्यात यावे, यांसाठी प्रयत्न करू.

तरुणांना इतर शिक्षणासमवेत सक्तीचे सैन्य शिक्षण द्यावे ! – प्रा. राजेंद्र ठाकूर, अभ्यासक, स्वातंत्र्यवीर सावरकर

‘स्वातंत्र्यवीर सावरकर यांचे हिंदुत्व आणि आजचे वास्तव’ या विषयावर बोलतांना प्रा. राजेंद्र ठाकूर म्हणाले की, स्वातंत्र्यवीर सावरकरांनी ‘हिंदुत्व’ नावाच्या लिहिलेल्या ग्रंथाला आज १०० वर्षे पूर्ण झाली आहेत. ३७० कलम काढले, श्रीराममंदिर बांधले, आता आपणाला अखंड भारत करायचा असल्याने देशात ‘समान नागरी कायदा’ झालाच पाहिजे. तरुणांना इतर शिक्षणासमवेत सक्तीचे सैन्य शिक्षण दिले पाहिजे. सर्वप्रथम सावरकर आणि पू. डॉ. हेडगेवार यांनी हिंदु राष्ट्राची उद्घोषणा केली होती. सावरकरांचे हिंदुत्व गुळगुळीत नाही, तर कणखर आहे. हिंदु राष्ट्रासाठी सर्वांनी २४ सूर्यनमस्कार घालण्याचा संकल्प केला पाहिजे.

अल्पसंख्यांकांच्या विरोधात हिंदूंची वज्रमूठ सिद्ध झाली पाहिजे ! – गजानन तोडकर, शहराध्यक्ष, हिंदु एकता आंदोलन

हिंदु एकता आंदोलनाचे शहराध्यक्ष श्री. गजानन तोडकर ‘हिंदु धर्म परिषदे’चा उद्देश सांगतांना म्हणाले की, हिंदु धर्म, देव आणि देश यांच्यावर प्रतिदिन अन्याय होत आहे. या संकटाचा सामना करण्यासाठी संपूर्ण महाराष्ट्रात ‘हिंदु धर्म परिषद’ घेण्यात येणार आहे. याचा प्रारंभ पश्चिम महाराष्ट्रातून झाला आहे. देशात अल्पसंख्यांक मतांच्या जोरावर हिंदूंना वाकवतात. त्यामुळे याचा विचार करून हिंदूंची वज्रमूठ सिद्ध झाली पाहिजे. जिथे बुरखाधारी जन्म घेणार, तेथे ताराराणीचा जन्म होईल. देशात अल्पसंख्यांकांचा उद्दामपणा वाढला आहे. त्यांच्याकडून हिंदूंवर सतत अन्याय होत आहे.   निधर्मी लोक केवळ मतांसाठी अल्पसंख्यांकांची बाजू घेत आहेत. आम्हीही हिंदूंच्या रक्षणासाठी एकगठ्ठा मते (व्होट बँक) सिद्ध करू.

हिंदु मुलींकडून धर्माचरण करवून न घेतल्याने त्या ‘लव्ह जिहाद’मध्ये फसतात ! – सद्गुरु स्वाती खाडये

सनातन संस्थेच्या धर्मप्रचारक सद्गुरु स्वाती खाडये म्हणाल्या की, ‘लव्ह जिहाद, लँड जिहाद आणि हलाल जिहाद’ची समस्या ही केवळ आपल्या देशातीलच नव्हे, तर जागतिक स्तरावरील समस्या आहे. ‘केरला स्टोरी’ या चित्रपटातून ‘लव्ह जिहाद’ची भयानकता दाखवण्यात आली आहे. अश्लील वेबसीरिज, बॉलीवूडचे चित्रपट आणि दूरदर्शनवरील काही मालिका ‘लव्ह जिहाद’ला कारणीभूत आहेत. ज्यामध्ये मुसलमान अभिनेता आणि हिंदु अभिनेत्री यांचे प्रेमप्रसंग, विवाह, प्रणय प्रसंग आदी दाखवून समाजात ‘लव्ह जिहाद’चा एकप्रकारे प्रसार केला जात आहे. आपल्या कुटुंबातील लहान मुला-मुलींना आपली संस्कृती आणि परंपरा यांचे महत्त्व सांगितले जात नाही. त्यांच्याकडून धर्माचरण करवून घेतले जात नाही. त्यामुळे अशा मुली मोठ्या झाल्यावर यात फसतात.

क्षणचित्रे…

१. हिंदु धर्म परिषदेच्या बाहेर कागल येथील ‘जय श्रीराम’ ध्वज हलगी पथका’तील लहान मुलांनी आकर्षक ध्वज आणि हलगी यांची प्रात्यक्षिके दाखवली, तसेच ‘शांतीदूत मर्दानी आखाडा पथकातील’ युवकांनी मर्दानी खेळ दाखवून उपस्थितांची मने जिंकली !

२. हिंदु धर्म परिषदेला येणार्‍या प्रत्येक हिंदूला ‘गर्व से कहो हम हिंदू है’, अशा टोप्या देण्यात आल्या !

३. येणार्‍या हिंदूंचे तुतारी वाजवून स्वागत करण्यात येत होते.

४. शहरात ठिकठिकाणी हिंदु धर्म परिषदेत सहभागी होण्याचे आवाहन करणारी होर्डिंग लावण्यात आली होती.

५. हिंदु धर्म परिषदेत सर्व हिंदुत्वनिष्ठांनी भगव्या टोप्या आणि वस्त्रे परिधान केली होती.