सांगली, कोल्हापूर येथे अवेळी पाऊस !

कोल्हापूर, १७ एप्रिल (वार्ता.) – गेले अनेक दिवस उन्हाळ्यामुळे हैराण झालेल्या नागरिकांना अवेळी पावसाने दिलासा दिला. कोल्हापूर जिल्ह्यात जयसिंगपूर, शिरोळ येथे अवेळी पावसाने उपस्थिती लावली, तर सांगलीतही दुपारी ४ च्या सुमारास जोरदार वार्‍यासह गारा पडल्या. कुरुंदवाड, दत्तवाड यांसह अनेक गावांमध्ये चांगला पाऊस झाला. सांगलीत वादळी वार्‍यामुळे अनेक ठिकाणी झाडे उन्मळून पडली, तसेच अनेक ठिकाणी झाडे पडल्याने वीज गेली होती. ऐन वेळी आलेल्या पावसाने भाजीविक्रेते, तसेच व्यापारी, तसेच नागरिक यांची पळापळ झाली.