‘हलाल सर्टिफिकेशन’ हा ‘जिझिया कर’च; यावर देशभरात बंदी आणा ! – रमेश शिंदे, राष्ट्रीय प्रवक्ते, हिंदु जनजागृती समिती

हिंदु जनजागृती समिती आयोजित ‘हलाल व्यापारावर योगीजींचा प्रहार !’ या विषयावर आयोजित ‘ऑनलाईन’ विशेष संवाद !

मुंबई – उत्तरप्रदेशचे मुख्यमंत्री मा. योगी आदित्यनाथजी यांनी ‘हलाल प्रमाणित’ उत्पादनांवर बंदी आणून भारताच्या अर्थव्यवस्थेवरील आक्रमण रोखण्यासाठी महत्त्वपूर्ण पाऊल उचलले आहे. ज्या प्रकारे मोगलांच्या काळात ‘जिझिया कर’ होता, त्याप्रमाणे आताच्या काळात ‘हलाल सर्टिफिकेशन’ (हलाल प्रमाणपत्र) हा खासगी कर इस्लामी संस्थांनी लागू केला आहे. याला भारत सरकारची कुठलीही मान्यता नाही. ‘हलाल सर्टिफिकेशन’मधून मिळालेला पैसा हा विविध बाँबस्फोटातील आतंकवाद्यांना सोडवण्यासाठी वापरला जातो. हिंदु व्यापार्‍यांवर सक्तीने लादलेल्या ‘हलाल सर्टिफिकेशन’वर बंदी आणली, तर भारताच्या सुरक्षेशी होणारा खेळ थांबेल, तसेच हिंदु व्यापार्‍यांचेही आर्थिक शोषण थांबेल. ‘हलाल सर्टिफिकेशन’च्या नियमांमध्ये उत्पादकांनी त्यांच्या आस्थापनात दोन मौलानांची (इस्लामचे धार्मिक नेते) नेमणूक करावी, असा जाचक नियमही लागू केला होता. आता उत्तरप्रदेशमध्ये तरी हा ‘लादलेला रोजगार’ थांबवला जाईल. उत्तरप्रदेश सरकारचा आदर्श घेऊन देशभरात बेकायदेशीरपणे चाललेल्या ‘हलाल सर्टिफिकेशन’वर बंदी आणावी, अशी मागणी हिंदु जनजागृती समितीचे राष्ट्रीय प्रवक्ते श्री. रमेश शिंदे यांनी केली. हिंदु जनजागृती समितीच्या वतीने ‘हलाल व्यापारावर योगीजींचा प्रहार !’, या विषयावर आयोजित ‘ऑनलाईन’ विशेष संवादात ते बोलत होते.

श्री. रमेश शिंदे यांनी मांडलेली महत्त्वपूर्ण सूत्रे

१. भारतात सरकारच्या ‘एफ्.एस्.एस्.ए.आय.’ आणि ‘एफ्.डी.ए.’ यांसारख्या खाद्यपदार्थांचे प्रमाणीकरण करणार्‍या संस्था असतांनाही ‘हलाल’च्या नावे खासगी इस्लामी संस्था हलाल प्रमाणपत्राची सक्ती करून हिंदु व्यापार्‍यांचे शोषण करू लागल्या.

२. ‘हलाल सर्टिफिकेट’ ही बाहेरील इस्लामी देशांची आवश्यकता आहे. ‘हलाल सर्टिफिकेट’ हे गहू, तांदूळ यांसारख्या धान्यांनाही दिले जाते, हे आम्हाला सुद्धा माहिती नव्हते.

३. ‘असे कुठे आमच्या पंथात लिहिलेलेही नाही’, असे ‘मुस्लिम महासंघा’ने आता जाहीर केले आहे. ‘जमियत-उलेमा-ए-हिंद’च्या ‘हलाल सर्टिफिकेट’ला शिया मुसलमानबहुल देशात मान्यता नाही.

४. हलाल सर्टिफिकेट ‘डेटिंग वेबसाईट’, ‘लिपस्टिक’ यांसारख्या वस्तूंवर का लादले गेले ? हेही समाजासमोर यायला हवे !

५. हलाल मांसाच्या विक्रीवर उत्तरप्रदेश सरकारने कुठेही बंदी घातलेली नसून अन्य जीवनावश्यक उत्पादनांवर बेकायदेशीरपणे लागू केलेल्या ‘हलाल सर्टिफिकेट’वर बंदी घातली आहे.

श्री. रमेश शिंदे यांनी ‘हलाल’ या विषयावर जागृती करण्यासाठी ‘हलाल जिहाद : भारतीय अर्थव्यवस्थेवरील आक्रमण ?’, हे पुस्तक लिहिले आहे. ‘हिंदु समाजाने ते अवश्य वाचावे. ‘हलाल प्रमाणित’ अशा उत्पादनांवर ग्राहकांनी बहिष्कार घालायला हवा’, असे आवाहनही या वेळी केले.