मी १० ज्यू लोकांची हत्या केली ! – हमासचा आतंकवादी

हमासचा आतंकवादी त्याच्या वडिलांना भ्रमणभाषवरून माहिती देतांनाचा ऑडिओ इस्रायलकडून प्रसारित !

तेल अविव (इस्रायल) – इस्रायल आणि हमास यांच्यात चालू असलेल्या घडामोडींची माहिती इस्रायली सैन्य आणि संरक्षण मंत्रालय त्यांच्या विविध ‘एक्स’ खात्यांवरून सातत्याने प्रसारित करत आहेत. त्यांनी हमासच्या एका आतंकवाद्याचे त्याच्या वडिलांशी झालेले ऑडिओ संभाषण प्रसारित केले आहे. त्यात महमूद नावाचा आतंकवादी त्याच्या वडिलांना सांगत आहे की, त्याने १० ज्यू लोकांची हत्या केली आहे.

इस्रायली संरक्षण मंत्रालयाने म्हटले की, महमूदने ७ ऑक्टोबर या दिवशी १० ज्यू लोकांची हत्या करून त्याची माहिती त्याने त्याच दिवशी त्याच्या वडिलांना दिली. यासाठी त्याने मारलेल्या एका ज्यू महिलेचाच भ्रमणभाष वापरल्याचेही इस्रायलने म्हटले आहे. या वेळी महमूदचे वडील त्याला म्हणतात, ‘अल्लाहू अकबर (अल्ला महान आहे). खुदा तुझे रक्षण करो ! अल्ला तुला सुरक्षितपणे घरी पोचवेल, याची खात्री वाटते !’ या वेळी महमूदची आईही त्याचे कौतुक करत असल्याचे ऑडिओत एकायला मिळत आहे.