पलूस (जिल्हा सांगली) येथे २ मार्चला अभाविपच्या वतीने १ सहस्र फूट भव्य तिरंगा पदयात्रा !

पलूस (जिल्हा सांगली), १ मार्च (वार्ता.) – अखिल भारतीय विद्यार्थी परिषद पलूसकडून भारतीय स्वातंत्र्याच्या अमृत महोत्सवी वर्षाच्या निमित्ताने २ मार्च या दिवशी भव्य १ सहस्र फुटाची तिरंगा पदयात्रा काढण्यात येणार आहे. धोंडीराम नगरी पलूस येथे सांगली जिल्ह्यामध्ये प्रथमच अशा पदयात्रेचे आयोजन करण्यात आले आहे, अशी माहिती संयोजक श्री. ऋषिकेश पोतदार यांनी दिली.

श्री. पोतदार म्हणाले, ‘‘सध्या चालू असलेल्या भारतीय स्वातंत्र्याच्या अमृत वर्षाच्या निमित्ताने अभाविप वेगवेगळ्या प्रकारचे सामाजिक कार्यक्रम राबवत आहे. याच अनुषंगाने पलूस मध्ये सर्व ग्रामस्थांना समवेत घेऊन महाविद्यालयीन विद्यार्थ्यांसमवेत तिरंगा पदयात्रेचे आयोजन केले आहे. २ मार्च या दिवशी सकाळी ८ वाजता लक्ष्मणराव किर्लोस्कर महाविद्यालय पलूस येथून पदयात्रेचा प्रारंभ होणार आहे.’’