कोल्हापुरात शिवसेनेने कन्नड रक्षण वेदीकेचा ध्वज जाळला !

कोल्हापूर, १४ डिसेंबर (वार्ता.) – महाराष्ट्र एकीकरण समितीचे अध्यक्ष दीपक दळवी यांच्यावर शाई फेकल्याच्या निषेधार्थ शिवसेनेच्या वतीने बिंदू चौकात कन्नड रक्षण वेदीकेचा ध्वज जाळण्यात आला. या वेळी कर्नाटक सरकारच्या विरोधात घोषणाबाजी करण्यात आली. या प्रसंगी शिवसेनेचे जिल्हाध्यक्ष संजय पवार म्हणाले, ‘‘ही घटना कर्नाटक राज्य सरकार पुरस्कृत आहे. यापुढे कर्नाटकचे असे कोणतेही कृत्य खपवून घेतले जाणार नाही.’’ या प्रसंगी विजय देवणे, अवधूत साळोखे, सुशांत देसाई, विनोद खोत, रणजित आयरेकर यांसह अन्य उपस्थित होते.

बेळगाव बंदला शहर आणि ग्रामीण भागात प्रतिसाद !

बेळगाव – दीपक दळवी यांच्यावर शाई फेकल्याच्या निषेधार्थ महाराष्ट्र एकीकरण समितीच्या वतीने १४ डिसेंबर या दिवशी बंद पुकारण्यात आला होता. या बंदला शहर आणि ग्रामीण भागात प्रतिसाद मिळाला. बंदच्या पार्श्वभूमीवर बहुसंख्य व्यवहार बंद ठेवण्यात आले होते, तसेच ग्रामीण भागातील बस बंद ठेवण्यात आल्या होत्या.