कोल्हापूर येथील श्री महालक्ष्मीदेवीच्या मंदिरात बाँब ठेवल्याचा दूरभाष केल्याच्या प्रकरणी दोघे जण कह्यात

कोल्हापूर, ९ ऑक्टोबर – नवरात्रोत्सवातील पहिल्याच दिवशी दुपारी ४ वाजता श्री महालक्ष्मीदेवीच्या मंदिरात पूजेच्या ठिकाणी बाँब ठेवल्याचा निनावी दूरभाष पोलीस मुख्यालयात आला होता. यानंतर पोलिसांनी बाँबशोधक पथकाच्या साहाय्याने अन्वेषण केले असता काहीही आढळून आले नव्हते. या प्रकरणाचे अधिक अन्वेषण करत पोलिसांनी पेठ वडगाव येथील बाळासाहेब कुरणे आणि सुरेश लोंढे या दोघांना कह्यात घेतले आहे. या दोघांनी मद्याच्या नशेत हा दूरभाष केल्याचे समोर आले आहे. या दोघांनी ‘गोवा नियंत्रण कक्षा’लाही दूरभाष केला होता. गोवा येथून कोल्हापूर पोलीस अधीक्षकांना याविषयी कळवण्यात आले होते. (अशांना कठोरात कठोर शिक्षा केल्यासच पुन्हा असे कृत्य करण्यास कुणी धजावणार नाही ! – संपादक)