पाचगणी (जिल्हा सातारा) येथे मुंबईच्या पर्यटकांवर कारवाई

सातारा – पाचगणी येथे लपून-छपून पर्यटक येत आहेत. पोलिसांना मुंबई ‘पासिंग’च्या ३ गाड्या आढळून आल्या. पोलिसांनी तातडीने या पर्यटकांना ४ सहस्र रुपये दंड करत पाचगणी सोडण्यास सांगितले; मात्र तरीही हे पर्यटक पाचगणी येथील हॉटेल ब्रिकलँड येथे आल्याची माहिती नगरपालिका पथकाला मिळाली. (यावरून केवळ दंडाची कारवाई केल्याने नागरिकांवर वचक बसत नाही. नियम मोडणार्‍यांना कठोर शिक्षाच हवी, असे म्हटल्यास चूक ते काय ? – संपादक) पालिका पथकाने तातडीने हॉटेलवर धाव घेतली. तिथे त्यांना मुंबई ‘पासिंग’च्या ३ गाड्या आढळून आल्या. पथकाने तिन्ही गाड्यांवर प्रत्येकी २ सहस्र असा ६ सहस्र रुपये दंड वसूल केला आणि पाचगणी सोडण्याचे आदेश दिले. आदेशाचे उल्लंघन केल्यास गुन्हे नोंदवण्यात येतील, अशी चेतावणीही दिली.