अज्ञात वाहनाच्या धडकेने सातारा पोलीस दलातील कर्मचार्‍याचा मृत्यू

सातारा, २८ मार्च (वार्ता.) – अज्ञात वाहनाच्या धडकेत घायाळ झालेले सातारा पोलीस दलातील कर्मचारी संग्राम शिर्के यांचा रुग्णालयात उपचार चालू असतांना मृत्यू झाला आहे. संग्राम शिर्के हे वाई येथील उपविभागीय पोलीस कार्यालयात कर्तव्यावर होते.

२५ मार्चच्या रात्री १० वाजता पुणे-बेंगळुरू महामार्गावर त्यांना अज्ञात वाहनाने धडक दिली. अपघातस्थळी उपस्थितांनी शिर्के यांना तातडीने रुग्णालयात नेले; मात्र २६ मार्चच्या रात्री रुग्णालयातच त्यांची प्राणज्योत मावळली. या प्रकरणी शिर्के यांच्या वडिलांनी भुईंज पोलीस ठाण्यात तक्रार दिली असून अज्ञाताविरुद्ध गुन्हा नोंद करण्यात आला आहे.