शेतकरी आंदोलनाविषयी कलाकारांनी केलेल्या ट्वीटची चौकशी करणार ! – अनिल देशमुख, गृहमंत्री  

मुंबई – देहली येथे चालू असलेल्या शेतकरी आंदोलनाविषयी विविध चित्रपट कलाकार आणि क्रिकेट खेळाडू यांनी केलेल्या ट्वीटची चौकशी केली जाईल. केंद्र सरकारच्या दबावाखाली येऊन त्यांनी ट्वीट केले का ? याची पडताळणी केली जाणार आहे, अशी माहिती गृहमंत्री अनिल देशमुख यांनी ८ फेब्रुवारी या दिवशी येथे दिली. या संदर्भात काँग्रेस नेत्यांच्या तक्रारीनंतर गृहमंत्र्यांनी चौकशीचे आदेश दिले आहेत. राज्याचा गुप्तहेर विभाग याची चौकशी करणार आहे.

पॉप गायिका रिहाना, पर्यावरणवादी ग्रेटा थॅनबर्ग आणि पॉर्न स्टार मिया खलिफा यांनी ट्वीट केल्यावर भारतातील लता मंगेशकर, सचिन तेंडुलकर यांसह अनेक क्रिकेटपटू आणि कलाकार यांनी ट्वीट केले होते. भारताविरुद्ध प्रचाराचा भाग होऊ नका !, असे अभिनेता अजय देवगण यांनी, तर अर्धसत्य धोकादायक असते !असे ट्वीट अभिनेता सुनील शेट्टी यांनी केले आहे.