पालिका निवडणुकीच्या ३ आठवड्यांपूर्वी आरक्षण सूची घोषित करण्याचा न्यायालयाचा शासनाला आदेश

पणजी, २३ डिसेंबर (वार्ता.) – राज्यातील नगरपालिकांच्या निवडणुकीची अधिसूचना प्रसिद्ध होण्याच्या ३ आठवड्यांपूर्वी प्रभागांच्या आरक्षणाविषयी सूची घोषित करणार असल्याची माहिती गोवा शासनाने मुंबई उच्च न्यायालयाच्या गोवा खंडपिठाला दिली आहे. मुंबई उच्च न्यायालयाच्या गोवा खंडपिठाने शासनाचे हे म्हणणे मान्य केले आहे. न्यायालयाने संबंधित संस्थांना त्या अनुषंगाने कृती करण्याचे आदेश दिले आहेत.

नगरपालिकांची निवडणूक घोषित करायच्या १ मास पूर्वी नगरपालिकांच्या प्रभागांची फेररचना करणे किंवा प्रभागांचे आरक्षण करणे, यांविषयीचे निर्णय शासनाने घोषित करण्याची मागणी याचिकादाराने न्यायालयाकडे केली होती. या याचिकेवरील सुनावणीच्या वेळी न्यायालयाने हा आदेश दिला.