देशातील १८७ उपाहारगृहांतून लाखो रुपयांच्या सामानाची चोरी करणार्‍याला अटक

नवी मुंबई – महागडे कपडे घालून श्रीमंत गिर्‍हाईक असल्याचे भासवून देशातील १८७ उपाहारगृहांत चोरी करणार्‍या डॉनिल झोन या सराईत चोरट्याला वाशी पोलिसांनी अटक केली आहे. तो मूळचा तमिळनाडू येथील रहिवासी आहे.

डॉनिल याने वाशी येथील तुंगा उपाहारगृहात येऊन स्वत:च्या आस्थापनाची बैठक घेणार असल्याचे सांगितले. त्यासाठी त्याने हॉटेल प्रशासनाकडून महागडा भ्रमणसंगणक आणि महागडी दारूही मागवून घेतली. तसेच चांगल्या प्रकारच्या जेवणाची व्यवस्था करण्यास त्याने सांगितले. त्यानुसार हॉटेल प्रशासनाने सर्व सिद्धता केली; मात्र ऐनवेळी डॉनिल याने तेथून पळ काढला. हे लक्षात येताच उपाहारगृहाच्या मालकाने वाशी पोलीस स्थानकात तक्रार नोंद केली.
पोलिसांनी परिसरातील सीसीटीव्ही चित्रण पडताळून डॉनिल यांना घोडबंदर येथून अटक केली. अधिक चौकशीत त्याला देशातील १८७ उपहारगृहांत अशाच प्रकारे चोरी केल्याचे सांगितले. आतापर्यंत लाखो रुपयांचे सामान चोरल्याचे तपासात उघड झाले आहे.